Një ngjarje e rëndë ka ndodhur mbrëmjen e sotme në fshatin Bogdan të Beratit, ku një 57-vjeçar ka humbur jetën pasi u qëllua aksidentalisht me armë gjahu nga një bashkëfshatar.
Sipas njoftimit zyrtar të Policisë së Shtetit, rreth orës 21:00, shtetasi Th. Kuqi, 53 vjeç, banues në të njëjtin fshat, dyshohet se ka hapur zjarr me qëllim për të vrarë një kafshë të egër, por nga pakujdesia ka qëlluar shtetasin Adriatik Toska, 57 vjeç.
Fillimisht, viktima është transportuar me urgjencë drejt spitalit, por për shkak të plagës së rëndë të marrë, ka ndërruar jetë gjatë trajtimit mjekësor.
Sipas raportimeve paraprake, dyshohet se ngjarja ka ndodhur gjatë një tentative për të mbrojtur tokat bujqësore nga dëmtimi i kafshëve të egra.
Policia ka shkuar menjëherë në vendngjarje dhe ka shoqëruar 53-vjeçarin në ambientet e Drejtorisë Vendore të Policisë Berat për veprime të mëtejshme hetimore.
Grupi hetimor po punon për të zbardhur plotësisht rrethanat e këtij incidenti tragjik.
