Italia ka miratuar ndërtimin e një ure gjigante që do të lidhë Siçilinë me pjesën tjetër të vendit, duke shënuar nisjen e një projekti historik që ka mbetur në letër për dekada me radhë.
Ura do të shtrihet mbi Ngushticën e Mesinës dhe me gjatësi 3.7 kilometra do të jetë ura më e gjatë në botë me një hapësirë të vetme, duke thyer rekordin e deritanishëm të mbajtur nga Ura e Çanakalasë në Turqi.
Pavarësisht shqetësimeve mjedisore, financiare dhe teknike që e kanë vonuar projektin që nga fundi i viteve '60, qeveria e djathtë e Giorgia Melonit e ka konsideruar si prioritet dhe ka ndarë 13.5 miliardë euro për ndërtimin e saj dhe infrastrukturën përreth në dekadën e ardhshme.
Komiteti Ndërministror për Planifikim Ekonomik dhe Zhvillim të Qëndrueshëm (CIPESS) i dha dritën jeshile projektit të mërkurën në një takim në Romë, duke hapur rrugën për nisjen e punimeve.
“Nuk është një detyrë e lehtë, por ne e konsiderojmë këtë një investim në të tashmen dhe të ardhmen e Italisë”, deklaroi kryeministrja Meloni.
Ura, e cila pritet të përfundojë në vitin 2032, do të shërbejë për rreth 4.7 milionë banorët e Siçilisë, duke përmirësuar ndjeshëm lidhjet rrugore dhe hekurudhore me gadishullin italian.
