Shqipëria më në fund ka gjetur zgjidhjen për të ndalur korrupsionin, tashmë do t’i dënojë më butë! Me projektin e ri për Kodin Penal, qeveria duket se do të luftojë korrupsionin duke i dënuar të korruptuarit më pak. Në vend që të rritet ndëshkimi për ata që abuzojnë me pushtetin, Kodi i ri barazon zyrtarët e lartë me ata të zakonshëm, duke ulur ndjeshëm kufirin e burgimit nga 12 në maksimum 8 vjet, dhe minimalja nga 4 në 3.
Me pak fjalë, me shembuj konkretë, ish-kryeministri Sali Berisha, ish-presidenti Ilir Meta apo kryetari i Bashkisë së Tiranës, Erion Veliaj pritet të përfitojnë masa dënimi ndjeshëm më të ulëta nëse ky projekt i Kodit të ri penal miratohet nga deputetët në Kuvendin e Republikës së Shqipërisë Duke u ulur dënimi maksimal, automatikisht shkurtohet edhe afati i parashkrimit të veprës penale.
Përvetësimi i fondeve publike nga një ministër, deputet apo kryetar bashkie, do të dënohet maksimumi me tetë vjet në teori. Në praktikë, me procedurat e gjata, manovrat ligjore dhe afatet e reja të parashkrimit, ky projekt-kod mund të konsiderohet si një amnisti e heshtur për të pushtetshmit e korruptuar. Siç duket, kodi i ri është më shumë një akt përkëdhelje ndaj zyrtarëve të lartë të korruptuar sesa një përpjekje për drejtësi.
