Tensionet mes SHBA-së dhe Rusisë kanë hyrë në një fazë të re alarmante. Presidenti rus Vladimir Putin ka zhvendosur të paktën katër bombardues strategjikë Tu-95MS më afër Europës, sipas një raporti të publikuar nga Insider UA.
Këta avionë, që përdoren zakonisht për të goditur objektiva në Ukrainë, thuhet se janë të pajisur me raketa lundrimi, duke rritur ndjeshëm mundësinë për një sulm të madh të afërt.
Ky veprim vjen pak ditë pasi presidenti amerikan Donald Trump konfirmoi se kishte urdhëruar dy nëndetëse bërthamore të lëviznin më afër Rusisë, pas një kërcënimi për luftë atomike nga aleati i afërt i Putinit, Dmitry Medvedev. “Nëndetëset tona janë aty ku duhet të jenë,” deklaroi Trump të dielën në mbrëmje.
Bombarduesit rusë u zhvendosën më parë në bazën ajrore Ukrainka, 5,800 km në lindje të Moskës, për t’i shmangur sulmet ukrainase. Por sipas raportit, katër prej tyre janë rikthyer në bazat më afër kufirit me Ukrainën dhe disa janë të ngarkuar tashmë me raketa.
Nga ana tjetër, Ukraina njoftoi të hënën se kishte shkatërruar një avion rus Su-30 dhe kishte dëmtuar katër të tjerë në një sulm në Krime. Midis tyre përfshiheshin edhe tre avionë bombardues Su-24.
Këto zhvillime ndodhin në një javë kur i dërguari i posaçëm i Trump, Steve Witkoff, pritet të udhëtojë në Rusi përpara se SHBA të vendosë sanksione të reja ndaj Kremlinit, nëse nuk merren hapa drejt një armëpushimi. Trump i ka dhënë Putinit afat deri të premten për t’i dhënë fund luftës.
Ndërkohë, Kremlini është përpjekur të distancohet nga deklaratat provokuese të Medvedevit, duke theksuar se qëndrimi zyrtar përcaktohet vetëm nga Presidenti Putin. Zëdhënësi i tij deklaroi: “Nuk duam përshkallëzim. Rusia është shumë e kujdesshme në çështjet bërthamore dhe beson se nuk ka fitues në një luftë bërthamore.”
Po ashtu, Rusia ka shtuar sulmet në Ukrainë në ditët e fundit. Shtatë persona humbën jetën dhe 13 u plagosën, përfshirë një foshnjë katër muajshe, në një nga sulmet më të fundit.
Presidenti ukrainas Zelensky reagoi ashpër: “Rusia po godet civilët përgjatë të gjithë vijës së frontit. Po vret fëmijë, mjekë, punonjës shpëtimi... Bota ka mjaft fuqi për ta ndalur këtë. Çdo ditë vonesë i kushton jetë Ukrainës.”
