Në atë që ngjan më shumë me një skenar distopian se sa një projekt edukativ, Rusia ka nisur një program të gjerë testimi të trurit për fëmijë dhe adoleshentë, me qëllim identifikimin e "liderëve" dhe "anti-liderëve". Iniciativa është lançuar nga Rospatriottsentr, një organ shtetëror që synon të rrisë ndjenjën e patriotizmit te të rinjtë dhe t’i orientojë ata drejt roleve “ku performojnë më mirë”.
Përmes një procesi të quajtur neuroprofilizim, 10.000 fëmijë të moshës 12 deri 18 vjeç po testohen në rajone të ndryshme të vendit. Fituesit me “profile pozitive” do të ftohen në një seminar 5-ditor në Sevastopol, Krimea e pushtuar – një vend simbolik për ambiciet gjeopolitike të Putinit. Por kush shpreh skepticizëm ndaj patriotizmit, përjashtohet menjëherë.
Organizatorët po pretendojnë se përmes analizës së “perceptimeve kognitive ndaj simboleve” mund të dallojnë kush ka cilësi lidershipi dhe kush është i prirë për sjellje “çrregulluese”. Edhe pse autoritetet nuk kanë dhënë hollësi mbi metodat, partner në këtë projekt është kompania Persona, e cila shet teste për neuroprofilizim.
Psikologë dhe edukatorë kanë reaguar ashpër. Dima Zicer, një edukatore ruse, e ka quajtur projektin një përpjekje për kontroll dhe manipulim në emër të pseudoshkencës. “Është shumë e përshtatshme për shtetin t’i japë një shtytje një 14-vjeçari në një drejtim të caktuar, dhe ta mbajë aty për gjithë jetën,” ka thënë ajo, duke kujtuar hijet e komunizmit dhe fashizmit.
Në të njëjtën kohë, autoritetet në Siberi po planifikojnë ndërtimin e një qendre rinore 65 milionë dollarëshe të quajtur “Pallati i të Rinjve”, ku do promovohet edukimi patriotik dhe vlerat shtetërore.
Që nga kthimi i Putinit në presidencë më 2012 dhe sidomos pas nisjes së luftës në Ukrainë, Kremlini ka intensifikuar përpjekjet për t’i kthyer të rinjtë në mbështetës të paepur të narrativave të pushtetit. Shkollat, librat e historisë, ora e ushtrisë dhe tani edhe testet e trurit – janë kthyer në mjete të një edukimi që shmang mendimin kritik dhe nxit bindjen totale.
Kritikët paralajmërojnë se në vend të rritjes së liderëve të lirë, Rusia po ndërton një brez të indoktrinuar.
