Një turiste nga Ukraina ka ndarë me redaksinë e JOQ Albania një përvojë të pakëndshme që përjetoi gjatë pushimeve të saj në Durrës.
Ngjarja ka ndodhur të mërkurën në orët e pasdites, në zonën e njohur si Rrota e Kuqe, ku ajo kishte shkuar për t’u freskuar në det.
Sipas saj, gjithçka ndodhi brenda 5 minutash, ndërsa ajo ishte futur në det për t'u larë. Kur u kthye në breg, zbuloi se i kishin vjedhur çantën, telefonin, kufjet, rrobat dhe madje edhe peshqirin, duke i lënë vetëm shapkat. Policia u njoftua nga pushuesit e tjerë, por mbërriti me vonesë, ndërsa nuk kishte asnjë kamerë sigurie në zonë.
Mesazhi i saj i plotë:
“Përshëndetje JOQ! Dua të ndaj një situatë që më ndodhi në plazhin e Durrësit të mërkurën pasdite. Rreth orës 17:10 dola në plazh në zonën e Rrota e Kuqe. Vendosa peshqirin, çantën sipër tij dhe fsheha poshtë kufjet dhe iPhone 14 Pro. Hyra në det për vetëm pesë minuta për t’u larë. Kur u ktheva, të gjitha sendet e mia ishin zhdukur. Mbeta pa rroba, pa çantë, pa pajisje dhe madje pa peshqir, e vetmja gjë që më kishin lënë ishin shapkat. Falë Zotit që nuk kisha marrë çelësin e apartamentit me vete.
Njerëzit në plazh thirrën policinë, por u desh shumë kohë që të vinin. Nuk ka kamera sigurie në plazh, ndaj informacioni i vetëm që kam është nga një grua që ishte ulur aty pranë. Ajo më tha se një i ri erdhi me vrap, kapi të gjitha sendet e mia dhe u largua me shpejtësi.
Më vonë e njëjta gjë i ndodhi edhe një burri tjetër, që ishte ulur në tavolina afër, i cili u grabit gjithashtu. I kishin vjedhur telefonin kur ishte larguar vetëm për një minutë.
Shpresoj që mesazhi im të arrijë tek të tjerët dhe i bëj thirrje të gjithë turistëve që të jenë më të kujdesshëm!”
Ky nuk është rasti i parë që raportohet për vjedhje në plazhet shqiptare, veçanërisht në zonat ku mungon sigurimi dhe nuk ka kamera survejimi.
Fatkeqësisht, këto ngjarje jo vetëm që dëmtojnë imazhin e vendit, por cenojnë rëndë përvojën e vizitorëve që zgjedhin të pushojnë në Shqipëri.
JOQ Albani i bën thirrje autoriteteve të marrin masa më serioze për të garantuar sigurinë në zonat turistike dhe për të parandaluar ngjarje të tilla që lënë një shije të hidhur tek turistët e huaj.
