Një vendim i përbashkët i këshilltarëve të Partisë Socialiste dhe Partisë Demokratike në Sarandë ka shkaktuar revoltë të madhe në zonën e Nivicës, ku është miratuar dhënia me qira e 60 hektarëve tokë për ndërtimin e një parku fotovoltaik nga kompania “Park Sol Energy”.
Mbledhja e Këshillit Bashkiak u zhvillua me dyer të mbyllura, ndërsa jashtë saj qindra banorë u përplasën me policinë, duke e quajtur këtë akt një “grabitje të tokave të tyre”.
“Hiqni dorë nga ai projekt, sa u bë Kakomeja aq do bëhet dhe ky. Ne do vritemi pikë,” – tha një qytetar i revoltuar.
Banorët pretendojnë se toka në fjalë është pronë e tyre e trashëguar dhe e dokumentuar, por shteti po i përjashton nga procesi:
“Nuk pretendojmë, kjo është prona jonë. Na ndaluan të hyjmë në mbledhje, vulosën, firmosën dhe e shitën si punë të kryer.”
Ata kërkojnë dhënien e çertifikatave të pronësisë, ndërsa policia është akuzuar se vepron me urdhra verbalë për të bllokuar hyrjen e qytetarëve, jo për të mbrojtur të drejtën e tyre.
Kompania që do ndërtojë parkun, “Park Sol Energy”, është krijuar në shtator 2022 dhe zotërohet nga Paqsor Buzi dhe Agim Xhindoli.
I pyetur për situatën, ish-kryeministri Sali Berisha u shpreh i habitur:
“Në aparencë nuk është normale. Ligji detyron dialog me komunitetin.”
Ndërsa partitë e mëdha shfaqen të unifikuara kur vjen puna për interesat ekonomike, qytetarët e Nivicës mbeten në luftë për të mbrojtur atë që e quajnë të drejtën e tyre mbi tokën.
