Duke nisur nga tetori 2025, Bashkimi Evropian do të vërë në funksion sistemin e ri të automatizuar EES (Entry/Exit System) për regjistrimin e të gjithë udhëtarëve nga vendet jashtë BE-së, qofshin mbajtës vizash afatshkurtra apo të përjashtuar nga viza, sa herë që kalojnë kufijtë e jashtëm të Unionit.
Ky sistem do të mbledhë të dhëna si: emri i personit, lloji i dokumentit të udhëtimit, të dhëna biometrike (gjurmët e gishtave dhe fotografia e fytyrës), si dhe data dhe vendndodhja e hyrjes dhe daljes. E gjithë kjo do të bëhet në përputhje të plotë me të drejtat themelore dhe mbrojtjen e të dhënave personale.
EES do të zëvendësojë metodën aktuale të vulosjes manuale të pasaportave, që është e ngadaltë, e pasaktë dhe nuk lejon ndjekjen e saktë të kalimeve kufitare apo identifikimin e personave që qëndrojnë më gjatë se sa lejohet.
Sistemi do të regjistrojë gjithashtu rastet e refuzimit të hyrjes në BE, duke ndihmuar në parandalimin e migracionit të parregullt dhe në rritjen e sigurisë për qytetarët evropianë.
Sipas Komisionit Evropian, EES do ta lehtësojë udhëtimin për shtetasit e ndershëm nga vendet e treta, ndërkohë që do të mundësojë identifikimin më efikas të shkelësve të qëndrimit dhe rasteve të mashtrimit me dokumente apo identitet.
Për më tepër, sistemi i ri do të mbështesë kontrollet kufitare të automatizuara dhe sistemet vetëshërbyese, që janë më të shpejta dhe më të rehatshme për udhëtarët.
