Policia e Sarandës po vijon kërkimet për gjetjen e një turisti portugez 57-vjeçar, Antonio Manuel Antunes Gonçalves, i cili u zhduk pasditen e djeshme në zonën pranë lagunës së Butrintit, në vendin e njohur si “Buka e Vivarit”. Gonçalves ishte duke qëndruar për drekë me miqtë e tij kur, rreth orës 18:00, hyri në det për t’u larë dhe nuk u rikthye më.
Që prej mëngjesit të sotëm, Policia Kufitare ka angazhuar një mjet lundrues për të kontrolluar zonën detare, ndërsa forcat e Komisariatit të Policisë Sarandë po kërkojnë edhe nga toka. Deri tani nuk ka asnjë gjurmë të 57-vjeçarit, i cili nuk është parë më nga asnjë dëshmitar pas hyrjes në det.
Ndërkohë, është ngritur një grup hetimor për të zbardhur rrethanat e ngjarjes, ndërsa autoritetet po i trajtojnë me prioritet çdo informacion që mund të ndihmojë në lokalizimin e tij. Gonçalves kishte ardhur në Sarandë për pushime me disa miq dhe zhdukja e tij ka ngritur shqetësim të madh në zonë.
