Një tjetër punonjës i Policisë së Burgjeve i është drejtuar redaksisë së JOQ Albania për të denoncuar padrejtësitë e vazhdueshme që ata përjetojnë në punë, ku shkeljet ligjore dhe shpërfillja institucionale janë kthyer në normë.
Sipas tij, prej 1 janarit 2021, me hyrjen në fuqi të ligjit nr. 1020/2020, punonjësve të policisë së burgjeve u takojnë ushqime të përfshira në pagë, por nuk i kanë marrë asnjëherë, ndërsa autoritetet heshtin dhe nuk japin asnjë përgjigje.
Ai gjithashtu thekson një tjetër shkelje flagrante: pagesat për ditët e shtuna dhe të diela, të cilat duhet të kompensohen përkatësisht me 120% dhe 150% të pagës, lëvrohen sikur të ishin ditë të zakonshme pune. Kur punonjësit kërkojnë llogari, eprorët u thonë thjesht: “Hidhni shtetin në gjyq dhe do fitoni vetëm për 3 vitet e fundit.”
“Ju lutem bëni diçka. Jemi familjarë. Kolegët tanë në Policinë e Shtetit i marrin të gjitha, ne jo,” përfundon ai.
Kujtojmë që JOQ Albania ka publikuar disa herë më parë raste të ngjashme, ku punonjës të Policisë së Burgjeve kanë denoncuar trajtimin e pabarabartë, mungesën e pagesës së 13-të, kushtet e vështira të punës dhe mosrespektimin e të drejtave minimale që u garantohen me ligj.
Një tjetër efektiv pak javë më parë denoncoi:
“Nuk mund të na krahasojnë me pensionistët, sepse po lejmë trurin në punë dhe përballojmë çdo ditë presionin e të dënuarve.”
Pavarësisht se përballen çdo ditë me rrezik e presion psikologjik, këta punonjës vijojnë të injorohen nga shteti, duke mos marrë as shpërblimet që u takojnë me ligj.
JOQ Albania i bën thirrje publike Ministrisë së Drejtësisë, ministrit Ulsi Manja dhe drejtorit të Përgjithshëm të Burgjeve Klevis Qose, të japin llogari dhe të marrin masa të menjëhershme për zbatimin e ligjit dhe trajtimin me dinjitet të këtyre punonjësve, të cilët janë shtylla e rendit në një nga strukturat më të vështira të sistemit tonë.
