Këtë mëngjes është vënë në pranga shtetasi Çlirim Dogani. Ermalinda Rama është vajza që mbyti babain e saj me tel sepse nuk e linte të vishej në mënyrë ekstravagante. Dogani 55 vjeç, banues në fshatin Arapaj të Roskovecit ka ndihmuar Ermalinda Ramën dhe Valbona Ramën, nënë e bijë për të vrarë Anesti Ramën, kryefamiljarin e familjes në fjalë.
Çlirim Dogani ka bashkëpunuar me shtetasen Ermalinda Rama 26 vjeçe në vrasjen e babait të saj nëpërmjet strangulimit, mbytje me tel, si edhe duke përdorur sende të forta dhe mjete prerëse. Dëshmitë e të afërmve, fqinjëve dhe kryeplakut të fshatit Frashër të Fierit, nxjerrin një tjetër anë të vrasjes makabre të babait nga vajza dhe fshehjes së krimit nga nëna.
Kunata dhe fqinji i viktimës thonë se 56-vjeçari Anesti Rama nuk ishte fanatik, por se vajza dhe gruaja e dhunonin, e linin në dhomë më vete, pa ngrenë dhe i merrnin rrogën. Vajza e dytë e viktimës së Fierit, e cila jeton në Itali dhe larg familjes, ka treguar se motra dhe mamaja i thanë që babai ishte rrëzuar në banjo.
Njoftimi i policisë:
Punë e pandërprerë hetimore për zbardhjen e plotë të rrethanave të ngjarjes së ndodhur në fshatin Frashër, ku shtetasja E. R. vrau për motive të dobëta, babanë e saj.
Vihet në pranga bashkëpuntori i 26-vjeçares.
Në vijim të hetimeve të kryera me qëllim dokumentimin e plotë të rrethanave të ngjarjes, specialistët e Seksionit për Hetimin e Krimeve Kundër Personit të Drejtorisë Vendore të Policisë Fier bënë ndalimin e shtetasit Ç. D., 55 vjeç, banues në fshatin Arapaj, Roskovec.
Nga kryerja e hetimeve dyshohet se ky shtetas ka bashkëpunuar me shtetasen E. R., në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse.
Materialet procedurale iu referuan Prokurorisë së Fierit, për veprime të mëtejshme.
