Ish-drejtori i Përgjithshëm i Policisë së Shtetit, Gledis Nano, ka dalë fitues në përballjen ligjore me qeverinë, pasi Gjykata Administrative e Apelit ka lënë në fuqi vendimin e Shkallës së Parë, duke e shpallur të paligjshëm shkarkimin e tij nga detyra.
Trupa gjykuese ka rrëzuar ankimimin e paraqitur nga Këshilli i Ministrave dhe Ministria e Brendshme, të cilat kërkonin anulimin e vendimit që i dha të drejtë Nanos për shkarkimin nga detyra.
Me këtë vendim përfundimtar, shteti shqiptar detyrohet t’i paguajë Gledis Nanos një dëmshpërblim të barabartë me 60 paga mujore, që i korrespondojnë mandatit të ndërprerë prej pesë vitesh, me një vlerë totale rreth 100 mijë euro.
Nano u shkarkua më 31 gusht 2022, me propozim të ish-ministrit të Brendshëm Bledi Çuçi, ndërkohë që kryeministri Edi Rama kishte deklaruar se i kishte kërkuar dorëheqjen. Si arsye zyrtare për largimin e tij u citua "mosrealizimi i objektivave".
Gledis Nano tashmë është në vlerësim për të marrë drejtimin e Byrosë Kombëtare të Hetimit, ku ka kaluar fazën e parë të vlerësimit nga komisioni.
