Një përplasje e dhunshme ka ndodhur pasditen e sotme në plazhin e Kavalishencës në Durrës, pranë shtëpisë së pushimit të punonjësve të Policisë së Shtetit. Në sherr janë përfshirë disa pushues dhe punonjësi që kujdeset për rendin dhe mirëmbajtjen e çadrave të plazhit.
Sipas një qytetari që ka dërguar videon në redaksinë e JOQ Albania, dy të rinj që po luanin me top në rërën pranë çadrave, kanë debatuar me punonjësin e plazhit pasi ky i fundit u kërkoi të ndalonin lojën, pasi po shqetësonin pushuesit e tjerë.
Situata ka degjeneruar shpejt në përplasje fizike, ku është përfshirë edhe një person i katërt, i cili dyshohet të jetë prindi i njërit prej pushuesve. Në pamjet filmike, shihet qartë që punonjësi shtyhet me duar prej tyre dhe më pas përplaset në tokë nga një prej të rinjve.
"Djali i cadrave nuk kishte faj. Ata të dy bashkë me një prind e goditën dhe e përplasën në tokë, sepse ai u tha që nuk duhet të shqetësojnë pushuesit e tjerë me topin. Ata i thanë punonjësit se nuk i njohin rregullat dhe nuk është ai që duhet t'ju tregojë rregullat atyre. Kur ndodhin këto në Kavalishencën e Policisë, imagjino në vende të tjera," – shkruan qytetari.
Fatmirësisht, situata është neutralizuar nga pushues të tjerë që ndodheshin pranë dhe kanë ndërhyrë për të ndalur konfliktin, i cili mund të kishte përfunduar me pasoja më të rënda.
