Një skandal i përmasave të mëdha është zbuluar ditën e sotme në një magazinë në Vorë, të quajtur “Master AL”, ku bëhesh falsifikimi i datave të skadencës së ushqimeve të ndryshme të cilat më pas hidheshin përsëri në treg.
Sipas hetimeve, në këtë fabrikë që kishte si aktivitet import-eskportin dhe tregtimin e produketev industriale dhe ushqimore, grumbulloheshin produkte të skaduara në tregje të ndryshme në Tiranë, Durrës e Elbasan. Më pas këtyre produkteve u falsifikohej data e skadencës dhe hidheshin përsëri në treg, të pashoqëruara me dokumentacion tatimor.
Policia ka sekuestruar brenda fabrikës 716 koli me produkte dhe dhjetëra kilogramë mallra ushqimorë të përpunuar, të cilat kishin skaduar që në muajt janar dhe shkurt 2025, por ky afat u ishte falsifikuar me qëllim rihedhjen në treg.
Në pranga për këtë sakndal që vë në pikëpyetje sigurinë ushqimore të gjithë shoqërisë kanë rënë administratori i “Master AL” Florenc Domi 38-vjeç dhe një magazinjer, i quajtur Agim Domi 58-vjeç.
Gjithashtu janë proceduar penalisht Skifter Tagani 56-vjeç i cili është ortak në këtë subjekt dhe një shofer i magazinës, 58-vjeçari me inicialet A. D.
Ndaj personave të arrestuar dhe proceduar penalisht, janë referuar materialet në prokurori për veprat penale “Shkelja e të drejtave të pronësisë industriale”, “Falsifikimi i vulave, stampave ose formularëve”, “Fshehja e të ardhurave”, “Mospagimi i taksave dhe tatimeve”, “Punësim i paligjshëm” dhe “Importi, prodhimi, shitja, ruajtja e ushqimeve të rrezikshme për shëndetin ose jetën e njerëzve”.
Njoftimi i Policisë:
Policia e Shtetit
Finalizohet operacioni policor i koduar “Siguria Ushqimore”, i zhvilluar nga Sektori për Hetimin e Krimit Ekonomik e Financiar në DPPSh, në bashkëpunim me Komisariatin e Policisë nr. 7.
Zbulohet në Vorë një magazinë ku falsifikoheshin etiketat e produkteve ushqimore të skaduara, të cilat më pas hidheshin sërish në treg.
Sekuestrohen sasi të mëdha mallrash ushqimore të përpunuara të skaduara në muajin janar dhe shkurt me etiketa skadence të falsifikuara.
Arrestohen në flagrancë administratori i magazinës dhe magazinieri. Procedohen penalisht ortaku dhe shoferi i magazinës.
Në kuadër të planit të masave për kontrollet në magazina, dyqane dhe supermarkete, me qëllim parandalimin e tregtimit të produkteve ushqimore të skaduara, u finalizua operacioni “Siguria Ushqimore”.
Si rezultat i operacionit u arrestuan në flagrancë shtetasit F. D., 38 vjeç, administrator i subjektit dhe A. D., 58 vjeç, magazinier.
U proceduan penalisht shtetasit S. T., 56 vjeç, ortaku i subjektit dhe A. D., 36 vjeç, shofer i magazinës.
Nga hetimet rezultoi se subjekti me aktivitet import-eksport dhe tregtim të produkteve industriale dhe ushqimore, grumbullonte produkte të skaduara nga tregje të ndryshme në Tiranë, Durrës e Elbasan, u falsifikonte datat e skadencës dhe i hidhte sërish në treg, pa dokumentacion tatimor.
Gjatë operacionit u sekuestruan në cilësinë e prova materiale 716 koli dhe dhera kilogramë me mallra ushqimorë të përpunuara që kishin afatin e skadencës në janar dhe shkurt 2025 dhe afati i skadencës ishte falsifikuar me qëllim rihedhjen në treg për shitje.
Materialet procedurale i kaluan Prokurorisë së Juridiksionit të Përgjithshëm Tiranë, për veprime të mëtejshme për veprat penale “Shkelja e të drejtave të pronësisë industriale”, “Falsifikimi i vulave, stampave ose formularëve”, “Fshehja e të ardhurave”, “Mospagimi i taksave dhe tatimeve”, “Punësim i paligjshëm” dhe “Importi, prodhimi, shitja, ruajtja e ushqimeve të rrezikshme për shëndetin ose jetën e njerëzve”.
Policia e Shtetit fton qytetarët të denoncojnë çdo rast abuzimi me sigurinë ushqimore në numrin pa pagesë 112.
