Plehrat mbulojnë trotuaret e Fushë-Krujës, duke rritur rrezikun për aksidente dhe duke nxjerrë zbuluar dështimin e institucioneve vendore për pastrimin urban.
Në Fushë-Krujë, rrugët janë kthyer në depo mbetjesh urbane, ku trotuaret nuk shërbejnë më për këmbësorët, por si vendgrumbullim plehrash. Pavarësisht se në disa zona ka kosha mbeturinash, ato nuk përdoren dhe plehrat hidhen pa asnjë kriter në të dyja anët e rrugës.
Pamjet janë të trishta: trotuare të bllokuara, rrugë të ngushtuara nga mbetjet dhe një ndjenjë e përgjithshme braktisjeje që përshkon gjithë zonën. Kalimi është kthyer në një sfidë për qytetarët dhe makinat, të cilët rrezikojnë përditë nga ndotja e ajrit.
Situata është bërë edhe më e rrezikshme për shkak të mungesës së infrastrukturës dhe dështimit për të zbatuar rregullat më bazike të pastrimit urban. Në vend që të ndërhyjnë, institucionet heshtin.
Bashkia Krujë dhe kryetari i saj, Artur Bushi, kanë zgjedhur të qëndrojnë pasivë përballë kësaj situate alarmante. As drejtuesit e qendrës administrative të Fushë-Krujës nuk kanë dhënë asnjë reagim apo zgjidhje.
Për banorët, kjo është një dëshmi e qartë e braktisjes institucionale dhe mungesës totale të përgjegjësisë. Zhgënjimi rritet ndërsa ndotja përkeqësohet dhe askush nuk mban përgjegjësi.
Pastrimi i qytetit nuk është më një çështje estetike, por emergjencë për shëndetin publik. Nevojitet ndërhyrje urgjente për të kthyer normalitetin në jetën urbane të Fushë-Krujës dhe për të rikthyer respektin për qytetarin.
Në fund, faji nuk është vetëm i atyre që hedhin plehrat, por mbi të gjitha i atyre që paguhen për të pastruar dhe nuk e bëjnë. Mungesa e kontrollit dhe llogaridhënies po shkatërron çdo standard jetese në këtë qytet.
