Një masiv gurësh i hedhur në rrugën kryesore të Laknasit ka bllokuar qarkullimin e automjeteve, duke rrezikuar sigurinë publike dhe jetën e qytetarëve.
Një situatë absurde është krijuar prej ditësh në rrugën kryesore të fshatit Laknas, ku një sasi e madhe gurësh është hedhur në mes të karrexhatës. Pamjet tregojnë një pengesë të qartë për qarkullimin normal të automjeteve, duke detyruar drejtuesit e makinave të shmangin rrugën ose të rrezikojnë kalimin mes rrezikut.
Banorët lokalë shprehen të shqetësuar dhe thonë se asnjë institucion nuk ka ndërhyrë për pastrimin e rrugës, edhe pse rreziku për aksidente është i madh, sidomos gjatë orëve të vona të natës ose në kushte me shikueshmëri të ulët.
"Shiko çfarë bëhet në rrugën e Laknasit", thotë një prej banorëve të zonës. Ai thekson se kjo situatë ka ditë që vazhdon, ndërkohë që autoritetet heshtin.
Ky bllokim i rrugës, përveçse krijon vështirësi për banorët, dëmton dhe bizneset lokale që varen nga lëvizja e lirë e mjeteve. Për më tepër, ambulanca apo shërbimet emergjente do ta kenë të pamundur të hyjnë në lagje në raste urgjente.
Kjo ngjarje ngre shqetësime serioze mbi neglizhencën e institucioneve për sigurinë rrugore dhe menaxhimin e infrastrukturës. Deri më tani, nuk ka asnjë reagim nga Bashkia Kamëz apo nga strukturat përkatëse që duhet të ndërhyjnë për të larguar gurët dhe për të kthyer normalitetin në rrugë.
Mbetet për t’u parë nëse presioni i komunitetit dhe denoncimet publike do të nxisin autoritetet që të ndërhyjnë. Ndërkohë, rruga në Laknas vijon të jetë e bllokuar, dhe rreziku i një aksidenti mbetet i pranishëm çdo moment.
