Gjykata e Posaçme Kundër Korrupsionit dhe Krimit të Organizuar ka pranuar kërkesën e ish-shefit të Qarkullimit Rrugor të Tiranës Roven Zeka, për ndryshim të masës së sigurisë nga “Arrest me Burg” në një masë më të butë.
GjKKO vendosi ta lirojë Rovenin duke i caktuar masën “Arrest në Shtëpi”. Një muaj më parë Roven Zeka kërkoi zëvendsim të masës së sigurisë, me argumentin se gjendja e tij shëndetësore është e paqëndrueshme, një argument që përdoret nga shumë zyrtarë të arrestuar si një ‘truk’ për të fituar lirinë e parakohshme.
Sipas raportimeve, Roveni u rrëzua në ambientet e paraburgimit gjatë një ndeshje kalçeto dhe theu legenin.
SPAK e akuzon ish-zyrtarin policor për “Korrupsion”, lidhur me procedurat e ndjekura në hetimin e një aksidenti, pasi dyshohet se ai mori një shumë rreth 2 000 euro nga një biznesmen, për të manipuluar provat në një aksident ku fajtore ishte bashkëshortja e këtij të fundit.
Për këto akuza Roveni qëndroi vetëm tre muaj në paraburgim, ndërkohë që në ditën kur ndaj tij u lëshua urdhri i arrestit, ai tentoi t’i ikte me vrap oficerëve të BKH-së. Në një moment të dytë, zyrtari policor u shfaq me një video të kuruar, ku paraqiste ‘vetëdorëzimin’ e tij në komisariat.
