Një park lodrash pranë njësisë bashkiake nr. 14 në Astir është braktisur prej javësh dhe po kthehet në vatër infeksionesh për fëmijët.
Një banor i zonës i shqetësuar i është drejtuar redaksive me një apel publik, duke kërkuar ndërhyrjen e institucioneve për rikthimin e sigurisë në parkun e lodrave përballë njësisë bashkiake nr. 14 në Astir. Sipas denoncimit, parku është lënë në harresë të plotë.
Prej disa javësh, askush nuk është kujdesur për pastrimin apo mirëmbajtjen e këtij ambienti që në thelb duhet të jetë një hapësirë rekreative për fëmijët. Aktualisht, vendi është mbuluar nga papastërtitë dhe mungesa e higjienës, duke u kthyer në një kërcënim serioz për shëndetin e të miturve.
Prindërit janë të shqetësuar, pasi shumë prej tyre nuk kanë alternativa të tjera për t’i çuar fëmijët në një mjedis të sigurt dhe të pastër.
“Përshëndetje, nëse do e publikoni do na bënit nder, faleminderit. Parku i lodrave në Astir, përballë njësisë bashkiake 14. Ka javë që nuk vjen dot dikush këtu edhe është kthyer në një vatër infeksionesh për fëmijët.” – thuhet në apelin qytetar drejtuar redaksisë së JOQ.
Edhe pse parku ndodhet përballë një institucioni vendor, vëmendja ndaj tij duket se mungon krejtësisht. Asnjë masë nuk është marrë për përmirësimin e gjendjes apo për garantimin e kushteve minimale higjieno-sanitare.
Banorët kërkojnë reagim urgjent dhe rikthimin e funksionalitetit të parkut, duke theksuar se injorimi i këtij problemi përbën neglizhencë të rëndë ndaj fëmijëve dhe komunitetit.
Në mungesë të veprimit nga autoritetet, zona rrezikon të kthehet në një pikë e braktisur e qytetit, ku siguria dhe mirëqenia e fëmijëve mbeten në mëshirë të fatit.
