Mark Rutte takohet me Trump-in dhe drejtues të administratës amerikane për çështjet e sigurisë dhe Rusisë
Shefi i ri i NATO-s, Mark Rutte, do të mbërrijë nesër në Uashington për një vizitë dyditore ku pritet të zhvillojë takime të nivelit të lartë me presidentin Donald Trump dhe figura të tjera të administratës amerikane. Axhenda e tij lidhet me zhvillimet më të fundit në Ukrainë dhe tensionet në rritje me Rusinë.
Vizita e Rutte vjen në një moment kritik, pasi presidenti Trump ka sinjalizuar mbështetje për dërgimin e armëve në Ukrainë përmes NATO-s. Megjithëse njoftimi zyrtar për vizitën nuk përmendi arsye të qarta, ajo ndodh një ditë përpara një deklarate të paralajmëruar nga Trump që lidhet me marrëdhëniet me Rusinë.
Burime pranë Shtëpisë së Bardhë kanë lënë të kuptohet se Trump mund të njoftojë mbështetje për një projektligj të ri sanksionesh ndaj Moskës. Në këtë kontekst, prania e Rutte-s në Uashington shihet si një përpjekje për të koordinuar më ngushtë politikat transatlantike të mbrojtjes.
Gjatë vizitës, Rutte-ja do të takohet gjithashtu me Sekretarin e Shtetit amerikan, Marco Rubio, dhe sekretarin e Mbrojtjes, Pete Hegseth. Bisedimet pritet të përqendrohen në strategjinë e NATO-s për Evropën Lindore dhe forcimin e pozicionit të aleancës ndaj kërcënimeve nga Rusia.
Ky është udhëtimi i tretë në SHBA i Rutte-s në rolin e Sekretarit të Përgjithshëm të NATO-s, duke sinjalizuar përkushtimin e tij për të mbajtur lidhjet e forta me Uashingtonin në një kohë sfiduese për sigurinë globale.
Analistët vlerësojnë se ky takim do të jetë vendimtar për të përcaktuar qasjen e NATO-s në muajt e ardhshëm, veçanërisht nëse Shtetet e Bashkuara marrin hapa konkretë për të ndihmuar Ukrainën nëpërmjet mekanizmave të aleancës.
