Pak ditë më parë, drejtori i Policisë së Shtetit, Ilir Proda deklaroi se parkimi i dyfishtë në rrugë nuk do të konsiderohet më si një “shkelje e lehtë” thjesht administrative, por si një bllokim i kalimit të mjeteve që cenon sigurinë e qytetarëve dhe kufizon dhunshëm të drejtën e tyre për të lëvizur lirisht.
Ai tha se parkimi i dyfishtë do të trajtohet si vepër penale bazuar në nenin 293 të Kodit Penal, i cili parashikon dënim me gjobë ose me burgim gjer në tre vjet.
Por vetëm pak ditë pas kësaj deklarate, vetë Policia e Shtetit është kapur duke kryer një shkelje të tillë.
Në pamjet e mbërritura në redaksinë tonë duket se mjeti i policisë është parkuar në mënyrë të dyfishtë, duke bllokuar qarkullimin e automjeteve të tjera.
Qytetari që ka siguruar pamjet pyet nëse “edhe efektivët e policisë do të ndëshkohen sipas të njëjtit ligj që zbatohet për qytetarët”.
