Familja e Jane Wu padit universitetin pas përndjekjes, mbylljes së laboratorit dhe përfundimit tragjik të jetës së saj.
Familjarët e neuroshkencëtares kinezo-amerikane Jane Wu, kanë ngritur një padi të rëndë ndaj Universitetit Northwestern, duke e akuzuar për diskriminim racial dhe trajtim çnjerëzor që, sipas tyre, e çoi shkencëtaren drejt vetëvrasjes. Wu, e cila kishte dekada kontribut në fushën e kërkimit shkencor, ndërroi jetë në mënyrë tragjike pak muaj pas mbylljes së befasishme të laboratorit të saj në maj 2024.
Sipas padisë së ngritur nga familja, universiteti kishte ushtruar presion të vazhdueshëm mbi Wu, duke e larguar nga zyra dhe duke e shtruar me forcë në një institucion psikiatrik, pavarësisht se ajo nuk ishte akuzuar kurrë zyrtarisht. E bija, Elizabeth Rao, deklaroi se familja kërkon drejtësi për nënën e saj dhe dëshiron të parandalojë raste të ngjashme diskriminimi ndaj studiuesve të tjerë.
Wu ishte një qytetare e natyralizuar amerikane që jetonte në Çikago dhe kishte një karrierë kërkimore prej afro 40 vitesh, përfshirë rreth 20 vite në Northwestern. Laboratori i saj merrej me studimin e tumoreve dhe sëmundjeve neurodegjenerative. Sipas dokumenteve të padisë, pas një hetimi nga Instituti Kombëtar i Shëndetit në vitin 2019 mbi kontaktet e saj ndërkombëtare – përfshirë Kinën – universiteti filloi ta izolojë dhe të reduktojë rolin e saj profesional.
Padia tregon se pas përfundimit të hetimeve pa prova të paligjshmërisë, universiteti nuk e riktheu Wu në punë, por përkundrazi i kufizoi më tej aktivitetet, ia uli pagën dhe ia transferoi fondet kërkimore kolegëve meshkuj të bardhë. Në maj 2024, ajo u përjashtua plotësisht nga ambientet e universitetit dhe u shtrua në spitalin psikiatrik pa njoftuar të afërmit.
Dy javë pas lirimit të saj nga spitali, Wu kreu vetëvrasje. Familja thotë se ajo vuante nga ankthi dhe depresioni, të shkaktuar nga trajtimi i padrejtë dhe shkatërrimi i jetës së saj profesionale. Pavarësisht problemeve shëndetësore, ajo ishte ende në gjendje të punonte dhe kishte mbetur e përkushtuar ndaj kërkimeve të saj deri në fund.
Rao kujtoi nënën e saj si një grua të dashur dhe të përkushtuar, larg stereotipeve autoritare që shpesh i atribuohen grave aziatike. Ajo theksoi përkushtimin e Wu ndaj fëmijëve, kulturës dhe një jete të thjeshtë familjare, duke e përshkruar si një grua që transformonte çdo shtëpi në një vend të ngrohtë e të dashur.
Institucione si Forumi i Studiuesve Aziatiko-Amerikanë kanë dënuar qasjen e universitetit ndaj Wu, duke e cilësuar si shembull alarmant të frikës dhe përjashtimit në ambientet akademike amerikane. Në dhjetor 2024, edhe NIH pranoi se veprimet e saj ndaj studiuesve aziatikë kishin krijuar një klimë të vështirë dhe ndjesi të forta përjashtimi.
Familja Wu kërkon dëmshpërblim financiar për humbjen e tyre dhe përgjegjësi publike për institucionet që, sipas tyre, i shkatërruan jetën një prej mendjeve më të ndritura në fushën e neuroshkencës në SHBA.
