Presidenti turk e konsideron dorëzimin e armëve nga PKK si fundin e një epoke dhune dhe fillimin e bashkëjetesës kombëtare
Presidenti i Turqisë, Recep Tayyip Erdogan, e ka cilësuar dorëzimin e armëve nga Partia e Punëtorëve të Kurdistanit (PKK) si një moment historik për vendin. Në fjalën e mbajtur gjatë një takimi të nivelit të lartë në Ankara, ai tha se “plaga 47-vjeçare e terrorizmit është drejt mbylljes” dhe se tashmë po nis një faqe e re në historinë e Turqisë.
Erdogan theksoi se ky zhvillim është një fitore për të gjithë qytetarët pa dallim etnie. “Turqia ka fituar. Çdo qytetar – turk, kurd apo arab – ka fituar bashkë me vendin,” u shpreh ai, duke theksuar përpjekjet për paqe dhe bashkëjetesë.
Presidenti turk deklaroi se dorëzimi i armëve nuk është pjesë e ndonjë marrëveshjeje apo pazari politik. Ai nënvizoi se projekti për një Turqi të çliruar nga terrorizmi ka qenë një synim afatgjatë, i ndjekur me përkushtim dhe vendosmëri institucionale.
Në deklaratat e tij, Erdogan i quajti qytetarët kurdë “vëllezër” dhe i ftoi për dialog të hapur. Ai shtoi se kjo çështje nuk kufizohet vetëm me Turqinë, por përfshin edhe komunitetet kurde në Siri dhe Irak. “Do të ulemi dhe do të bisedojmë për çdo shqetësim. Ata janë të lumtur me këtë zhvillim,” tha ai.
Presidenti turk theksoi bashkëpunimin e mëtejshëm me qeverinë siriane dhe partnerët ndërkombëtarë për të garantuar një mjedis paqeje në rajon. Ai shprehu bindjen se vëllazëria mes komuniteteve do të mbizotërojë dhe se terrorizmi do të mbetet në të kaluarën.
Erdogan njoftoi se në kushtet e reja, burimet shtetërore do të përqendrohen në zhvillim, rritje ekonomike dhe mirëqenie sociale, jo më në luftën kundër terrorizmit. “Energjitë tona do të shkojnë për një Turqi më të fortë dhe më të begatë,” përfundoi ai.
Ai bëri të ditur gjithashtu se procesi i dorëzimit të armëve do të vëzhgohet dhe administrohet nga autoritetet shtetërore për të siguruar një kalim të qetë dhe të qëndrueshëm drejt paqes së plotë.
