Rimorkio e një kamioni të Salillari group, e mbushur me ujë dhe gurë, shkarkon ngarkesën mbi rrugë duke vënë në rrezik jetën e drejtuesve të tjerë.
Një incident shqetësues është regjistruar në një nga akset më të frekuentuara të vendit, ku një kamion i kompanisë Salillari është filmuar duke shkarkuar ngarkesën e tij në mënyrë të pakontrolluar gjatë lëvizjes në autostradë. Rimorkio ishte e mbushur me copa betoni, gurë dhe ujë, të cilat rrëshqitnin dhe përhapeshin mbi asfalt, duke krijuar një situatë tejet të rrezikshme për mjetet që lëviznin pas.
Pamjet tregojnë qartë se ngarkesa e rëndë rridhte nga pas rimorkios pa asnjë masë sigurie. Çdo frenim apo kthesë nga mjetet e pasme mund të përfundonte në një aksident tragjik. Fatmirësisht, nuk ka raportime për viktima apo përplasje të menjëhershme, por shqetësimi mbetet i madh për pasojat që kjo pakujdesi mund të kishte shkaktuar.
Dëshmitarët në vendngjarje shprehen të tmerruar nga ajo që panë. “E mbushur me ujë, kanali dhe copa guri binin drejt makinave. Salillari Group,” deklaron një qytetar që ndoqi nga afër ngjarjen.
Ky rast ngre pikëpyetje serioze mbi përgjegjësinë e kompanisë Salillari dhe respektimin e rregullave të transportit të ngarkesave në rrugët kombëtare. Sipas standardeve ligjore, çdo ngarkesë që transportohet duhet të jetë e mbuluar dhe e siguruar për të shmangur pikërisht këto situata.
Nuk është hera e parë që kjo kompani përmendet në ngjarje të tilla, ku mungesa e kontrollit dhe papërgjegjshmëria vihet në pah. Ekspertët e qarkullimit rrugor theksojnë nevojën urgjente për kontrolle më të rrepta dhe gjoba të ashpra për shkelësit e ligjit.
Deri më tani nuk ka asnjë reagim publik nga Salillari group lidhur me incidentin. Opinioni publik kërkon transparencë dhe përgjegjësi nga subjektet që vendosin fitimin mbi sigurinë e qytetarëve.
