Bashkëshortja e kapitenit Arben Anamali, i cili humbi jetën duke shpëtuar dy turistë të huaj nga mbytja në liqenin e Shkodrës, foli mes dhimbjes për burrin e saj, duke e përshkruar si një njeri të jashtëzakonshëm dhe gjithmonë të gatshëm për të ndihmuar të tjerët. Ajo tregoi se lajmin tragjik e mori nga një koleg i tij, me të cilin kapiteni kishte punuar më parë.
“Është një dhimbje e madhe për të gjithë familjen tonë, për nënën e tij në radhë të parë, për mua, për djalin dhe vajzën, dhe për të gjithë ata që e kanë njohur, sepse ka qenë njeri shumë i mirë, shumë punëtor dhe shumë i përkushtuar. Ka qenë shumë i dhënë pas të tjerëve, të gjithëve u thoshte: ‘Ke nevojë për gjë?’, sa dhe jetën e vet e dha për turistët. Na njoftoi një koleg që kishte punuar me të. Më tha që Beni ka pësuar aksident. Nuk e mendova këtë gjë, sepse ka qenë shumë i fortë fizikisht, i guximshëm, notar i mirë dhe nëse do të kishte aksident, do ta rregullonte vetë anijen", tha bashkëshortja e Anamalit.
E prekur thellë, ajo tha se fillimisht nuk e kishte menduar më të keqen, pasi Arbeni njihej për forcën e tij fizike, trimërinë dhe aftësitë e shkëlqyera si notar. Sipas saj, ai ishte një njeri i guximshëm që gjithmonë vinte të tjerët përpara vetes, dhe edhe në momentet e fundit, zgjodhi të shpëtojë jetë të tjera me çmimin më të lartë jetën e tij.
