Banorët e njësisë Kote në Bashkinë Selenicë denoncojnë mungesën e ujit të pijshëm dhe abuzimin me burimet publike nga bizneset e lidhura me pushtetin
Banorët e njësisë administrative Kote, në Bashkinë Selenicë, kanë ngritur alarmin për mungesën e zgjatur të ujit të pijshëm në çezmat publike, një problem që po rëndon çdo ditë jetën e tyre. Ata theksojnë se kjo situatë nuk është rastësore, por rezultat i një bashkëpunimi të qëllimshëm mes punonjësve të bashkisë dhe bizneseve që tregtojnë ujë në mënyrë të padrejtë.
Sipas banorëve, çezmat publike dikur ishin funksionale dhe furnizoheshin me ujë të pastër, pa kosto për qytetarët. Sot, këto çezma janë të thata dhe lihen qëllimisht jashtë funksionit. Më shqetësuesja është se bizneset që shesin ujë përdorin të njëjtin burim, por nuk paguajnë asgjë për shërbimin që u ofrohet.
"Përshëndetje JOQ,
Po ju drejtohemi në emër të banorëve të njësisë administrative Kote, Bashkia Selenicë, për të denoncuar një problem shumë të rëndë që po na prek prej kohësh: mungesën e ujit të pijshëm në çezmat publike."
"Çezmat publike në fshat, të ndërtuara me taksat tona, dikur furnizoheshin me ujë përmes rrjedhjes së lirë, pa kosto për askënd. Sot ato janë lënë në harresë dhe furnizimi është ndërprerë qëllimisht. Sipas burimeve vendase, kjo është bërë në bashkëpunim të punonjësve të bashkisë me biznese që shesin ujë, të cilat përfitojnë nga kjo mungesë. Ironikisht, këto biznese vetë përdorin ujin e ujësjellësit pa paguar asgjë. Ndërkohë, të moshuar që jetojnë krejtësisht të vetmuar dhe pa të ardhura të mjaftueshme për të blerë ujë, detyrohen të bëjnë rrugë të gjata për të mbushur bidonë me ujë nga një burim që ndodhet në një distancë të konsiderueshme. Kjo është jo vetëm e papranueshme, por edhe e rrezikshme për shëndetin e tyre."
"Ajo që e bën situatën edhe më absurde është fakti që uji "kthehet" vetëm gjatë fushatave zgjedhore dhe ndërpritet menjëherë pasi mbaron votimi. Një lojë e ulët me nevojat më bazë të qytetarëve."
"Kërkojmë ndihmën tuaj për ta bërë këtë denoncim publik. Duam të dëgjohemi dhe të detyrohen institucionet përgjegjëse të reagojnë."
"Me respekt, Banorët e njësisë administrative Kote, Bashkia Selenicë"
Në kushte të tilla, të moshuarit dhe banorët në nevojë, që nuk kanë mundësi financiare për të blerë ujë, detyrohen të ecin kilometra të tërë për të mbushur bidonë në burime të largëta. Kjo situatë jo vetëm është e padrejtë, por edhe rrezikon shëndetin e tyre, veçanërisht në temperaturat e larta të verës.
Ironikisht, ujësjellësi “rikthehet në jetë” vetëm gjatë periudhës së fushatave zgjedhore. Sa herë afrohen zgjedhjet, çezmat funksionojnë si për mrekulli, për t’u mbyllur sërish sapo votat të jenë hedhur. Një manipulim i ulët që përdor nevojat jetike të njerëzve për të mbledhur kapital politik.
Banorët kërkojnë reagim të menjëhershëm institucional dhe nxjerrjen para përgjegjësisë të atyre që kanë shndërruar ujin publik në një mjet fitimi dhe shantazhi elektoral. Ata i bëjnë thirrje mediave dhe shoqërisë civile që të denoncojnë këtë padrejtësi dhe të qëndrojnë në krah të qytetarëve.
Zëri i banorëve të Kotes është i qartë: nuk kërkojnë privilegje, por të drejtën për të jetuar me dinjitet, të paktën me ujë të pijshëm në shtëpitë e tyre. Heshtja e institucioneve vetëm sa e thellon më tej këtë padrejtësi sociale.
