Një banor nga Elbasani ka ngritur një shqetësim serioz në redaksinë tonë lidhur me cilësinë e ujit të pijshëm që vjen nëpërmjet rrjetit të ujësjellësit. Sipas tij, teksa po mbushte pishinën e fëmijës, nga tuba i ujit ka dalë një krijesë e çuditshme, e panjohur, që lëvizte në mënyrë të pazakontë.
Në pamjet që ai ka dërguar, vërehet qartë një gjallesë e hollë, e mbledhur dhe që reagon në kontakt me ujin. Ngjarja ka shkaktuar shqetësim për sigurinë dhe pastërtinë e ujit që konsumojnë përditë familjet në këtë zonë.
Qytetari ka shprehur indinjatën përmes këtij mesazhi:
"Jam një qytetar nga Elbasani. Po i mbushja pishinën fëmijës, nga tuba e ujit më doli kjo gjallesë. Presupozohet që ne e pimë këtë ujë në familje. Tani që u ngrit uji, shpresonim të rritej dhe cilësia e tij, por fatkeqësisht pamjet flasin vetë. Faleminderit nëse e postoni."
Ky rast ngre sërish pikëpyetje të mëdha mbi kontrollin dhe monitorimin e rregullt të rrjetit të ujësjellësit në qytete, si dhe për përgjegjësinë që institucionet duhet të tregojnë për të garantuar një nga të drejtat më themelore të qytetarëve, ujin e pijshëm të sigurt.
