Kryeministri izraelit paralajmëron se do të ndërhyjë ushtarakisht nëse Hamasi nuk pranon çarmatimin dhe dorëzimin e kontrollit në Gaza brenda 60 ditësh.
Kryeministri i Izraelit, Benjamin Netanyahu, ka deklaruar se do të ndjekë rrugën ushtarake nëse Hamasi nuk zbaton kërkesat themelore të vendosura nga Izraeli brenda dy muajve nga momenti i arritjes së një armëpushimi.
Në një mesazh të publikuar nga zyra e tij, Netanyahu theksoi se “qëllimi mbetet kthimi i çdo pengu në shtëpi”. Ai shtoi se menjëherë pas armëpushimit, pritet të fillojnë negociatat për t’i dhënë fund njëherë e mirë konfliktit me Hamasin.
Netanyahu nënvizoi se paqja mund të jetë e mundur vetëm nëse përmbushen disa kushte të panegociueshme: “çarmatimi i Hamasit, demilitarizimi i Gazës dhe eliminimi i çdo kapaciteti ushtarak apo qeverisës të Hamasit në territorin palestinez.”
Ai bëri të qartë se Izraeli është i hapur për një zgjidhje diplomatike, por nuk do të presë pafundësisht. “Nëse kjo nuk realizohet brenda 60 ditëve nga momenti i ndalimit të luftimeve, do ta realizojmë me mjete të tjera, duke përdorur forcën dhe aftësinë e ushtrisë sonë heroike,” paralajmëroi ai.
Mesazhi i Netanyahu vjen në një kohë kur negociatat për pengjet dhe armëpushimin po përpiqen të ringjallen përmes ndërmjetësve ndërkombëtarë, por ende pa rezultate konkrete.
Kjo deklaratë i vë trysni të dyfishtë Hamasit, duke e vënë atë përballë një afati strikt dhe paralajmërimit për përdorimin e forcës në rast refuzimi.
Situata mbetet e tensionuar dhe përshkallëzimi i mëtejshëm duket i pashmangshëm nëse nuk arrihet një marrëveshje përfundimtare në kohë rekord.
