Në Qendrën Spitalore Universitare “Nënë Tereza” punimet vijojnë orar pa orar, pa u shqetësuar fare për të sëmurët, zhurmat dhe ndotjen që krijohet.
Kjo situatë dhe mungesa e masave mbrojtëse gjatë shembjes së godinës së vjetër të urgjencës ka shkaktuar shqetësim tek pacientët dhe familjarët e tyre.
Vizitorja e një pacienti ka treguar se prej disa orësh fadromat po merren me shembjen e godinës, por askujt nuk i bën përshtypje pluhuri, zhurma dhe ndotja që krijohen dhe përhapen në të gjithë zonën përreth, përfshirë edhe ambientet e brendshme të spitalit.
Në pamjet e siguruara nga redaksia, duket qartë se zona ku po bëhet shembja nuk është e rrethuar dhe as nuk është ndërmarrë lagia e tokës për të minimizuar pluhurin. Ky neglizhim rrezikon seriozisht shëndetin e pacientëve, veçanërisht atyre me sëmundje të frymëmarrjes ose sistem të dobët imunitar.
Familjarët e pacientëve kërkojnë që të merren masa urgjente për të garantuar kushte minimale sigurie dhe higjiene, sidomos në një institucion që duhet të jetë model i standardeve shëndetësore.
