Presidenti francez Emmanuel Macron ndodhet për një vizitë treditore në Britani, ku përveç ceremonive mbretërore, diskutohet për migracionin dhe sigurinë në Ukrainë.
Presidenti francez Emmanuel Macron ka mbërritur këtë të martë në Mbretërinë e Bashkuar, për një vizitë shtetërore që ndërthur protokollin mbretëror me bisedime të vështira mbi migracionin përmes Kanalit të La Manshit dhe një plan sigurie për Ukrainën pas armëpushimit.
Vizita e Macron, e para e një kreu të shtetit të Bashkimit Evropian në Britani që nga Brexit-i, përbën një sinjal të qartë për përpjekjen britanike për të rikthyer marrëdhëniet me bllokun evropian. I ftuar nga Mbreti Charles III, presidenti francez do të shoqërohet nga bashkëshortja e tij Brigitte në një ceremoni tradicionale në Kalanë e Windsorit, përfshirë një vakt shtetëror dhe gardën ushtarake nderi.
Përveç pjesës ceremoniale, Macron do të mbajë një fjalim në galerinë mbretërore të Parlamentit dhe do të zhvillojë takime me Kryeministrin britanik Keir Starmer për çështje kyçe si mbrojtja, investimet dhe migracioni ilegal. Të enjten do të mbahet një samit dypalësh, ku zyrtarë të lartë nga të dy vendet do të diskutojnë kalimet e paligjshme me gomone nga Franca drejt Britanisë.
Edhe pse Britania pranon më pak azilkërkues se vendet mesdhetare, qindra emigrantë çdo javë nisen nga veriu i Francës drejt brigjeve britanike. Pas shtrëngimit të kontrolleve mbi kamionët, gomonet janë kthyer në mjetin kryesor të kalimit. Në gjashtë muajt e parë të vitit 2025, janë kapur mbi 20,000 kalime të tilla, një rritje prej 50% krahasuar me vitin e kaluar. Në vitin 2024 u regjistruan rreth 37,000 kalime – shifra e dytë më e lartë pas rekordit të vitit 2022.
Qeveria e Starmer ka premtuar të godasë bandat që qëndrojnë pas këtij trafiku, duke ndërtuar bashkëpunime më të ngushta me Francën dhe vende të tjera përgjatë rrugëve të emigrantëve nga Afrika dhe Lindja e Mesme. Britania kërkon gjithashtu marrëveshje me shtete të veçanta për kthimin e azilkërkuesve të refuzuar.
Oficialët britanikë po nxisin Francën të lejojë ndërhyrje të policisë edhe në ujëra më të thella, megjithëse kjo ide është kundërshtuar nga aktivistët e të drejtave të emigrantëve dhe sindikatat e policisë, për shkak të rrezikshmërisë. Sidoqoftë, Sekretarja e Brendshme Yvette Cooper vlerësoi "taktikat e reja të rëndësishme" që po përdor policia franceze, si dëmtimi i gomoneve para nisjes.
Nga ana tjetër, Macron dhe Starmer po përpiqen të shtyjnë përpara një plan për një forcë ndërkombëtare paqeruajtëse në Ukrainë, e mbështetur nga trupat evropiane dhe garancitë amerikane. Megjithatë, qëndrimi i ftohtë i Donald Trump e vështirëson avancimin e kësaj ideje, ndërkohë që lufta në Ukrainë vazhdon pa sinjale armëpushimi.
Të dy liderët pritet të marrin pjesë të enjten në një videokonferencë ndërkombëtare, për të diskutuar detaje të planifikimit të kësaj force. Sipas zyrës së Kryeministrit britanik, Starmer ka zhvilluar një bisedë me Presidentin ukrainas Volodymyr Zelenskyy, ku është nënvizuar përparimi i konsiderueshëm i bërë nga ekspertët ushtarakë në terren.
