Të paktën 88 persona kanë humbur jetën në përmbytjet që kanë goditur Texasin, ndërsa autoritetet intensifikojnë kërkimet për të mbijetuarit në zonat më të prekura.
Situata në Texas është përshkallëzuar në një krizë të vërtetë humanitare. Përmbytjet e rënda kanë marrë jetën e të paktën 88 personave në gjashtë qarqe të ndryshme të shtetit. Kerr County është goditur më rëndë, ku janë konfirmuar 75 viktima, përfshirë 48 të rritur dhe 27 fëmijë.
Shërbimi Kombëtar i Motit ka paralajmëruar për reshje të tjera intensive gjatë ditës, të cilat mund të shkaktojnë përmbytje të reja në zona tashmë të ngopura nga uji. Vëzhgimi për përmbytje është ende në fuqi për qytetet San Antonio, Austin dhe Kerr County, të paktën deri në orën 19:00 me orën lokale.
Përmbytjet nisën të premten, kur lumi Guadalupe pranë qytetit Kerrville shënoi një rritje dramatike me 6 deri në 8 metra. Valët e ujit përmbytën rrugët, ndërtesat dhe morën me vete dhjetëra jetë. Sipas autoriteteve federale, kjo situatë përbën një katastrofë madhore natyrore.
Në përgjigje të fatkeqësisë, presidenti Donald Trump ka firmosur dekretin për shpalljen e Kerr County si zonë fatkeqësie të jashtëzakonshme, duke hapur rrugën për ndihma federale për banorët e prekur dhe për rindërtimin e infrastrukturës.
Përveç Texasit, reshje të dendura janë raportuar edhe në shtete të tjera si Karolina e Veriut, ku po përjetohen përmbytje të ashpra dhe evakuime emergjente. Autoritetet lokale dhe federale po punojnë në terren për të ndihmuar banorët dhe për të shmangur humbje të mëtejshme në njerëz dhe pasuri.
