Autoriteti fetar turk, Diyanet, ka shkaktuar debat pasi ka paralajmëruar ndalimin e përkthimeve të Kuranit që nuk përputhen me parimet islame. Kjo ka nxitur kritika në lidhje me lirinë fetare dhe lirinë e interpretimit të shkrimeve të shenjta. Vendimi është parë si një përpjekje për të kontrolluar mënyrën se si interpretohet Islami në Turqi.
Diyaneti, i krijuar në vitin 1924, është një institucion me ndikim të madh në jetën fetare të vendit. Që prej vitit 2018, ai është vënë nën varësinë e drejtpërdrejtë të Presidentit Rexhep Tajip Erdogan dhe luan një rol të rëndësishëm në promovimin e axhendës së tij fetare. Me mbi 140,000 të punësuar dhe një buxhet që tejkalon atë të disa ministrive, Diyaneti ka ndikim të madh brenda dhe jashtë vendit.
Profesori i teologjisë, Özsoy, thekson se më parë interpretimi i Kuranit ishte detyrë e dijetarëve fetarë, por sot gjithnjë e më shumë besimtarë laikë lexojnë dhe interpretojnë vetë shkrimet. Ky zhvillim vjen si pasojë e rritjes së mendimit kritik, individualizmit dhe trendeve të reja brenda shoqërisë turke. Megjithatë, ai shpreh shqetësim për mungesën e kualifikimeve të përkthyesve të shumtë të Kuranit.
Në vitet e fundit, feja është bërë një temë e rëndësishme në debatin publik në Turqi. Të rinjtë tregojnë interes të madh për fenë, por shpesh e qasen atë në mënyrë kritike, duke sfiduar interpretimet tradicionale. Ky zhvillim konsiderohet shqetësues për qeverinë, e cila është përpjekur të promovojë një brez të ri të përkushtuar ndaj vlerave fetare.
Megjithatë, të dhënat e sondazheve tregojnë një realitet ndryshe. Sipas institut Konda, numri i njerëzve që identifikohen si fetarë ka rënë ndjeshëm në pesë vitet e fundit, ndërsa është rritur përqindja e atyre që deklarohen si jobesimtarë ose ateistë. Ky trend duket se sfidon përpjekjet e qeverisë për të islamizuar më tej shoqërinë turke.
