Në Australi, fëmijët nën moshën 16 vjeç nuk do të kenë më qasje në rrjetet sociale si TikTok, Instagram, Facebook, Snapchat, Reddit dhe X. Qeveria ka finalizuar detajet e zbatimit të një ligji të miratuar nga Parlamenti në nëntor të vitit të kaluar, i cili ndalon përdorimin e këtyre platformave nga të miturit.
Sipas këtij ligji, kompanitë që nuk arrijnë të bllokojnë krijimin apo mbajtjen e llogarive për përdorues nën moshën 16 vjeç, rrezikojnë gjoba deri në 50 milionë dollarë. Ligji parashikon disa përjashtime për shërbimet e mesazheve, lojërat online, si edhe platformat me karakter edukativ apo shëndetësor – mes tyre edhe YouTube dhe Google Classroom.
Qeveria ka mbrojtur vendimin për ta përjashtuar YouTube, duke argumentuar se platforma nuk funksionon si një rrjet social i zakonshëm, por si një mjet edukativ i përdorur nga shkollat, familjet dhe institucionet.
Megjithatë, Komisionerja për Sigurinë Online, Julie Inman Grant, ka kërkuar rishikimin e këtij përjashtimi. Në një letër drejtuar Ministres së Telekomunikacionit, Anika Wells, ajo ka theksuar se përjashtimi i YouTube bie në kundërshtim me qëllimin e ligjit.
“Në kushtet kur ekzistojnë rreziqe të njohura për fëmijët dhe kur platforma ka funksione të ngjashme me rrjetet e tjera sociale, përjashtimi i YouTube nuk ka justifikim të mjaftueshëm dhe bie ndesh me objektivin kryesor të ligjit,” thuhet në deklaratën e komisioneres.
Ndërkohë, gjigantët e tjerë të teknologjisë si Meta (pronar i Facebook dhe Instagram), TikTok dhe Snapchat kanë kritikuar vendimin, duke e cilësuar si të padrejtë, jologjik dhe një favor të madh për Google, pronarin e YouTube.
Ekspertë të shëndetit mendor dhe studiues të ekstremizmit kanë paralajmëruar se algoritmet e YouTube mund të çojnë të miturit lehtësisht drejt përmbajtjeve të rrezikshme, ekstremiste, mizogjene apo të dhunshme. Një test i agjencisë Reuters tregoi se nevojiten vetëm 12 deri në 20 klikime për të mbërritur në video të tilla.
Ministri australian i Shëndetësisë, Mark Butler, deklaroi se qeveria do të marrë parasysh shqetësimet e ngritura nga Komisionerja për Sigurinë Online gjatë hartimit të rregulloreve për zbatimin e plotë të ligjit.
“Prioriteti ynë kryesor është të mbrojmë fëmijët nga dëmet që vijnë nga përdorimi i pakontrolluar i internetit,” tha Butler. “Jemi vendi i parë në botë që vendos një ndalim të tillë për aksesin e të miturve në rrjetet sociale, dhe ministrat e shëndetësisë në mbarë botën po ndjekin me interes mënyrën se si po e zbatojmë këtë nismë.”
