Sabajet Shuti dënohet me burgim të përjetshëm në Londër për vrasjen e Lumturi Zeqjas në tetor të vitit 2022, ndërsa vëllai i tij përfundon pas hekurave për rolin në ngjarje
Sabajet Shuti, 31 vjeç, një ndër figurat qendrore të grupit kriminal shqiptar “Hellbanianz”, është dënuar me burgim të përjetshëm në Londër, pasi u shpall fajtor për vrasjen e Lumturi Zeqjas, 27 vjeç. Ngjarja ndodhi në muajin tetor të vitit 2022 dhe tronditi komunitetin shqiptar në Mbretërinë e Bashkuar.
Drejtësia britanike dënoi gjithashtu edhe vëllain e tij, Emirlion Shuti, 30 vjeç, i cili u shpall fajtor për përfshirje në sulm dhe u dënua me 20 muaj burg. Ai ishte i pranishëm në vendngjarje dhe luajti rol në përshkallëzimin e konfliktit që rezultoi fatal për Zeqjan.
Sipas mediave britanike, incidenti ndodhi mbrëmjen e 16 tetorit në rrugën Church Lane në Leytonstone, ku Zeqja po qëndronte jashtë një kafeneje së bashku me një mik. Dy vëllezërit mbërritën në zonë me dy makina. Pasi nisi një përplasje fizike, Emirlioni u përfshi i pari në konflikt. Më pas, Sabajet Shuti nxori një thikë dhe e goditi për vdekje Zeqjan, duke lënë të plagosur edhe mikun e tij.
Autori kryesor, Sabajet Shuti, u largua menjëherë pas krimit. Ai ndryshoi pamjen për të shmangur identifikimin dhe u arratis nga Britania përmes Kanalit, duke kaluar në Francë. Fshehja e tij zgjati afro një vit, deri më 3 tetor 2023, kur ai u kap në Suedi. Pas arrestimit, autoritetet suedeze e ekstraduan për në Mbretërinë e Bashkuar.
Nga ana tjetër, Emirlion Shuti ishte arrestuar më parë dhe ishte përballur me drejtësinë menjëherë pas ngjarjes. Dënimi i tij përfshinte rolin ndihmës në konflikt dhe përshkallëzimin e dhunës.
Policia arriti të identifikojë autorët përmes pamjeve të kamerave të sigurisë dhe të dhënave të mbledhura nga telefonat celularë. Këto prova ndihmuan në rindërtimin e ngjarjes dhe zbardhjen e tentativës së autorëve për t’u fshehur nga autoritetet.
