Një ceremoni e tejmbushur me yje dhe luks, ndërsa në Venecia zhvillohet dasma më e përfolur e vitit, mes atmosferës festive dhe protestave kundër miliarderit Bezos
Jeff Bezos dhe Lauren Sanchez pritet të kurorëzojnë dashurinë e tyre për herë të dytë, këtë herë në Venecia, në një ceremoni madhështore ku janë ftuar mbi 250 personalitete të njohura nga bota e kinemasë, politikës dhe biznesit global. Vendndodhja, Ishulli San Giorgio, ndodhet përballë Shën Markut dhe është zgjedhur për simbolikën e tij mes artit dhe financës.
Ceremonia do të zhvillohet në Teatro Verde, një amfiteatër i rrallë prej mermeri të bardhë nga Vicenza, i rrethuar nga pisha bregdetare dhe kopshte me labirinte. Ftesat speciale do të mbërrijnë me 35 taksi ujore, përmes dy klostrove të Fondacionit Cini, në një procesion që synon të mbajë privatësinë e nivelit më të lartë.
Në rast shiu, organizatorët kanë parashikuar që pritja të zhvendoset në refektoriumin e manastirit, ku ndodhet një kopje e veprës së famshme “Dasma në Kanë” nga Paolo Veronese. Pas ceremonisë, në drejtim të Lidos, është ndërtuar një pistë vallëzimi mbi ujë, ku çifti do të kërcejë nën tingujt e muzikës dhe yjeve të natës.
Mbrëmja do të kulmojë me një darkë të përgatitur nga tre kuzhinierë me yje Michelin nga Italia dhe Franca, ndërsa koncerti do të mbahet nga Matteo Bocelli, djali i tenorit të famshëm Andrea Bocelli, i cili do të udhëtojë posaçërisht nga Pompeia për këtë event.
Për ëmbëlsirat është angazhuar mjeshtri i famshëm i pastiçerisë Cédric Grolet nga Parisi, i njohur për tortat me formë lulesh dhe frutash. Jeff Bezos do të jetë veshur me kostum të firmës Armani, ndërsa për Lauren Sanchez janë përzgjedhur dy fustane të mundshëm nga Dolce & Gabbana dhe Oscar de la Renta.
Finalja e mbrëmjes do të ndriçojë qiellin venecian me një spektakël fishekzjarrësh të sinkronizuar me muzikë klasike. Festa e parë u zhvillua një natë më parë në kishën Madonna dell’Orto, ku muzika tradicionale italiane dhe kuzhina jugore krijuan një atmosferë të paharrueshme.
Muzika përfshinte këngë të Mina-s, Modugno-s dhe duete të njohura si “Felicità” e Albano-s dhe Romina-s. Ushqimi u përqendrua tek specialitetet napolitane e siciliane, duke sjellë aromat autentike të jugut italian për të ftuarit e klasit të parë.
Masat e sigurisë kanë qenë të jashtëzakonshme. Përveç qindra forcave policore që kanë bllokuar rrugicat dhe kanalet e lagjes Cannaregio, janë angazhuar edhe 40 agjentë të policisë bashkiake, të kontraktuar nga vetë Bezos përmes një donacioni prej 50 mijë eurosh.
Përpara ceremonisë kryesore, të ftuarit kanë shijuar një mëngjes në kopshtet e Villa Baslini, të preferuarat e Ernest Hemingway. Vizitat përfshijnë edhe furrat e xhamit të Murano-s, ku janë rezervuar turne private për VIP-at si Ivanka Trump dhe familjarët e saj.
Në hotelin luksoz Cipriani Belmond në Giudecca janë strehuar emra të njohur si Leonardo DiCaprio dhe modelja Vittoria Ceretti, ndërsa vëmendja tashmë është përqendruar te festa përmbyllëse që pritet të jetë një spektakël në vetvete.
Pas refuzimit të Scuola Grande della Misericordia, festa finale do të zhvillohet në Arsenale, një strukturë historike ku dikur Republika e Venedikut ndërtonte anijet luftarake. Ambienti është transformuar për një pritje me stilin e shekullit XVIII.
Pika më kulmore pritet të jetë performanca e Lady Gaga-s dhe Elton John-it, të cilët do të interpretojnë një duet të regjistruar. Sipas burimeve, secilit prej tyre i është ofruar një pagesë prej një milion paundësh për të marrë pjesë në këtë moment historik.
Ndër të ftuarit janë Bill Gates, Mark Zuckerberg, familja Trump, Mbretëresha Rania e Jordanisë me familjen, klani Kardashian, Orlando Bloom, Tom Brady dhe ikonat Oprah Winfrey e Diane von Furstenberg – një përzierje mes famës dhe financës.
Megjithatë, atmosfera nuk është pa tension. Aktivistët e lëvizjes “No Space for Bezos” kanë paralajmëruar protesta. Mbrëmjen e kaluar, ata projektuan me lazer në kambanoren e Shën Markut mesazhe të fuqishme si “No Kings No Bezos”. Një tjetër protestë është paralajmëruar për nesër.
