Një ngjarje e rëndë është regjistruar mesditën e sotme në zonën e Skelës në Vlorë, ku një përplasje mes dy automjeteve ka përfunduar në një konflikt të dhunshëm mes drejtuesve.
Pas përplasjes fillestare, njëri prej shoferëve, një i ri në moshë që drejtonte një automjet tip "Benz", ka goditur me qëllim disa herë makinën tjetër, duke e nxjerrë atë nga rruga. Fatmirësisht, drejtuesi i mjetit të sulmuar ka arritur të largohet me shpejtësi nga makina dhe nuk ka pësuar lëndime.
Në vendin e ngjarjes kanë mbërritur forca të shumta policie, të cilat kanë shoqëruar në komisariat drejtuesin e mjetit që kreu veprimet agresive. Të dy automjetet kanë pësuar dëme të konsiderueshme materiale.
Policia ka nisur hetimet për të zbardhur rrethanat e plota të ngjarjes dhe për të përcaktuar përgjegjësitë ligjore të përfshirëve.
Ngjarja ka tronditur qytetarët dhe turistët e Vlorës pasi gjithçka ka ndodhur shumë shpejt dhe në një moment të ditës që ka shumë lëvizje.
