Tropojani Seb Ponari i vendosi vetes një qëllim jashtëzakonisht sfidues, konkretisht të përshkruajë 2750 kilometra për 38 ditë nga Cambridge në Angli drejt Tropojës. TVA News ka zhvilluar një intervistë me maratonomakun që kreu sfidën e jashtëzakonshme. Në intervistën për TVA News, teksa po vraponte, Ponari u shpreh se pas sfidës së parë, tashmë po kryen një sfidë tjetër nga Tropoja për në Jug të Shqipërisë. Teksa po vraponte për të kryer sfidën e radhës, për gazetaren Sedjana Huna, maratonomaku Ponari u shpreh se vrapin e ka nisur që në datë 9 janar 2023, një dëshirë që në atë kohë i dështoi, por që me këmbënguljen që e gjeti brenda vetes së tij dhe qëllimit të vendosur, arriti që dëshirën për bërë me vrap rrugë të gjata ta realizoj këtë vit, 2750 km me zemër nga Anglia në Tropojë, dedikim për babain e tij të ndjerë, por jo vetëm dhe për të përmirësuar shëndetin e tij mendor.
“Fillova të vrapoj aksidentalisht në datën 9 janar të vitit 2023 dhe nuk arrita të bëj atë vrapin që i kisha vendosur vetes qëllim 60 km, nga shtëpia ime te një punë që kisha në atë kohë. Më kapi inati që nuk e realizova dot. Bëra stërvitje dhe i vura qëllim vetes që do t’ia arrij. Pas një viti, ia arrita. Te vrapi kam gjetur qetësi, arrita të reflektoj me veten. Ishte si terapi. Një person si unë që vuan nga mendimet e tepërta vazhdimisht, vrapi ka qenë kryesor që unë të përmirësoj kualitetin e jetës sime. Pasi nisa vrapimet e gjata, më lindi një ide që të vrapoj nga Anglia deri në Tropojë. Këtë vit vendosa ta realizoj qëllimin, pasi babai bën 10 vite që ka ndërruar jetë dhe këtë vrap nga shtëpia ime në Angli drejt shtëpisë së babit në Tropojë ia dedikoj babait tim të ndjerë. Tani po shkoj drejt Jugut, në Ksamil, për të realizuar sfidën e radhës”, u shpreh Ponari për TVA News.
PËR MË TEPËR NDIQNI INTERVISTËN ME SEB PONARIN
Sebi u shpreh se vrapi e ka ndihmuar jo vetëm mendërisht, por dhe fizikisht dhe shpirtërisht. Ai thekson se vrapi e ka ndihmuar të tejkalojë mendimet e tepërta nga të cilat ai vuan dhe që kërkon t'i largojë. Ai shprehet se jeta nuk është e thjeshtë dhe vrapi të ndihmon shumë që të përballosh çdo sfidë. Maratonomaku Seb Ponari tha se në 38 ditë vrap nga Anglia në Shqipëri asnjëherë nuk ka menduar të dorëzohet dhe kjo falë arsyes së fortë, për të cilën thotë se është shumë e rëndësishme pas objektivit që ne i vendosim vetes.
Më emocionuese në këtë intervistë ishin fjalët e ndjera të Sebit për babain e tij, për të cilin u shpreh se nëse do ta kishte përballë do t’i tregonte se sa shumë i ka munguar dhe se 2750 kilometrat ia ka kushtuar vetëm atij. “Një përqafim real me babain do të ishte dhurata më e madhe në jetë”, tha Ponari i prekur. Ponari u shpreh se ndihet i lumtur që shumë njerëz janë inspiruar nga sfida e tij dhe kanë marrë një mesazh pozitiv, pavarësisht sfidave të jetës me të cilat po përballet gjithsecili prej tyre.
Sa i përket itinerarit që bën ai në këtë sfidë, Ponari u shpreh se gjatë gjithë kohës është në vrap, teksa shtoi se ecjet i ka të pakëta, vetëm kur konsumon ushqim, apo ujë, ose kur takon dikë në shenjë respekti, pasi pushimet e gjata e bëjnë të humbasë ritmin. Në fund, Sebi tha se të gjithë duhet të kemi besim në vete nëse duam të marrim një hap në drejti një drejtimi të caktuar, pavarësisht sfidave në jetë.
“Çdo hap që bëni me besim në vete iu nxjerrë nga ajo situatë e vështirë ku jeni zhytur dhe në fund kur të shihni pas, do të thoni me vete se me të vërtetë ai hapi i parë ia ka vlejt” , ishte ky mesazhi i Seb Ponarit për të gjithë ata që kërkojnë një dritë jeshile për të gjetur paqen brenda vetes.
