Pasi u vu re në testim live nga disa përdorues javën e kaluar, pronari i X, Elon Musk, tani ka konfirmuar se një version i ri i asaj që ai e quan “XChat” është tashmë i disponueshëm për disa abonentë të X Premium dhe do të vijë për të gjithë përdoruesit me pagesë këtë javë.
Versioni i ri i mesazheve direkte (DM) në X është ndërtuar mbi një arkitekturë krejtësisht të re, e cila do t’i mundësojë X-it të krijojë një version më të qëndrueshëm të ofertës së tij të deritanishme të dobët për enkriptim.
Musk thotë se XChat i ri do të përfshijë:
Enkriptim të plotë si parazgjedhje
Mesazhe që zhduken
Mundësinë për të dërguar skedarë bashkëngjitur
Thirrje audio dhe video (pa numër telefoni)
Sipas Musk, shërbimi i ri është ndërtuar në “Rust me enkriptim në stilin e Bitcoin-it”, duke ofruar një nivel të ri sigurie për përdoruesit e DM-ve në X.
Megjithatë, siç kanë vënë re shumëkush, Bitcoin nuk është i enkriptuar – në fakt, është pothuajse e kundërta, pasi të gjitha transaksionet e Bitcoin janë të dukshme në blockchain. Kjo është pikërisht edhe ideja e një monedhe të decentralizuar, por sidoqoftë, versioni i ri i mesazheve në X është ndërtuar mbi një kornizë të re, të cilën X e përshkruan si një mundësi të re për ta përdorur sistemin e mesazheve për qëllime të ndryshme.
Dhe ngatërrimi i Musk me Bitcoin mund të sinjalizojë qëllimin më të gjerë të këtij përditësimi përdorimin e kësaj arkitekture të re të mesazheve si bazë për sistemin e ri të pagesave të X.
X vijon të punojë në prapaskenën e sistemit të vet të pagesave, i cili në të ardhmen do t’u lejojë përdoruesve të transferojnë para, të kryejnë blerje dhe madje ta zëvendësojnë bankën e tyre me llogarinë në X.
Vizioni i Elon-it për aplikacionin mbështetet fort mbi këtë element, dhe raportohet se X po synon të nisë versionin fillestar të X Payments më vonë gjatë këtij viti.
