“Maqedonia e Veriut nuk është kundër paqes në Palestinë, por disa elementë të përmbajtjes së rezolutës në Kombet e Bashkuara janë në kundërshtim me interesat tona kombëtare”.
Ky ishte shpjegimi që dha sot (13 qershor) ministri i Punëve të Jashtme dhe Tregtisë së Jashtme, Timço Mucunski, në lidhje me arsyen pse vendi votoi “abstenim” për rezolutën që u votua dje në Asamblenë e Përgjithshme në Kombet e Bashkuara (OKB), e cila bëri thirrje për armëpushim në Gaza.
Një nga elementët që ai tha se nuk korrespondonte me politikën e jashtme të Maqedonisë së Veriut ishte se rezoluta përmbante pjesë që ishin në kundërshtim me parimet themelore të së drejtës ndërkombëtare, si dhe fakti që nuk “përcaktonte qartë se çfarë është Hamasi”, i cili është shpallur organizatë terroriste si nga BE-ja ashtu edhe nga SHBA-ja.
“Për mua, nuk ka dyshim se Hamasi është një organizatë terroriste që kreu vrasje në territorin izraelit, por kur nuk ka një përkufizim të qartë të veprimeve të Hamasit, të asaj që bëri Hamasi, ne nuk mund të qëndrojmë pas një rezolute të tillë”, tha Mucunski.
Ministri i jashtëm u tha gazetarëve se “nuk ka dyshim se vendi dëshiron paqe” dhe tha se si një vend i vogël, po kontribuon sa më shumë që mundet.
