Një aksident i rëndë rrugor ka ndodhur pasditen e së shtunës në autostradën A6 pranë daljes për Bridel, në drejtim të Belgjikës, ku një përplasje midis një furgoni dhe një kamioni ka rezultuar fatale për një person.
Ngjarja ka ndodhur rreth orës 14:30, duke shkaktuar ndërprerje të mëdha në qarkullimin rrugor dhe bllokimin e plotë të segmentit përkatës të autostradës. Autoritetet kanë njoftuar për devijim të trafikut dhe kanë paralajmëruar vonesa të konsiderueshme gjatë gjithë pasdites.
Fatkeqësisht, nga ky aksident ka humbur jetën Ervin Sinani, 27 vjeç, një i ri shqiptar. Shërbimet emergjente, përfshirë zjarrfikësit, ekipet e shpëtimit (CGDIS), policinë dhe Autoritetin Kombëtar të Rrugëve, kanë ndërhyrë menjëherë në vendngjarje, por për të riun nuk ka mundur të bëhet asgjë.
Rrethanat që çuan në aksident mbeten ende të paqarta dhe një hetim zyrtar është në zhvillim e sipër.
