Një ngjarje e pazakontë dhe shqetësuese ka ndodhur 3 vite më parë pranë xhamisë “Dine Hoxha” në rrugën e Kavajës, ku disa persona hodhën fletushka me përmbajtje kundër fesë islame.
Prokuroria e Tiranës nisi hetimet për këtë ngjarje që u trajtua si akt që synon nxitjen e urrejtjes fetare, ndërsa në çështje u përfshi edhe Drejtoria e Antiterrorit.
Hetimet kanë përfunduar dhe është çuar për gjykim dosja ndaj imamit Ahmed Kalaja, i cili akuzohet për veprën penale “Veprime që pengojnë zbulimin e të vërtetës”, në bashkëpunim, një vepër që parashikon dënim me gjobë ose deri në tre vite burgim.
Sipas hetimeve, Kalaja akuzohet se ka refuzuar t’u dorëzojë autoriteteve pamjet e kamerave të sigurisë gjatë një operacioni të antiterrorit në vitin 2022, që lidhej me identifikimin e personave të dyshuar për shpërndarje materialesh me përmbajtje nxitëse ndaj komunitetit mysliman.
Në një reagim për mediat, ai ka mohuar akuzat dhe ka deklaruar se gjithçka është rezultat i një “keqkuptimi”, duke theksuar se ka bashkëpunuar me autoritetet në çdo fazë të hetimit.
Përmes një deklarate publike, imami i xhamisë, konfirmoi se ngjarja është denoncuar dhe se videoja e vetme e disponueshme për këtë akt është ajo e publikuar në rrjetet sociale.
Sipas tij, kamerat e sigurisë së xhamisë fshihen automatikisht çdo 20 ditë, çka ka pamundësuar dorëzimin e pamjeve për hetuesit.
