Një situatë e pazakontë dhe me tension është krijuar ditën e sotme pranë ambjenteve të Urdhrit të Psikologut, pas përfundimit të procesit zgjedhor për drejtuesin e këtij institucioni.
Brunilda Laboviti, e shpallur fituese e zgjedhjeve të fundit për kreun e urdhrit, është paraqitur sot për të marrë detyrën e saj të re. Megjithatë, ajo është përballur me Valbona Treskën, presidenten në largim, e cila ka refuzuar të lirojë zyrën, duke argumentuar se procesi zgjedhor është ankimuar zyrtarisht dhe se duhet të pritet shqyrtimi i këtij ankimi përpara çdo dorëzimi të funksioneve.
Por Laboviti e kundërshton këtë version pasi sipas saj ankimimi nuk merret parasysh për shkak se është shkrirë këshilli. Në mungesë të një zgjidhjeje në vend, Laboviti ka kontaktuar përfaqësuesin e saj ligjor dhe ka telefonuar Policinë e Shtetit, duke kërkuar ndërhyrje për zbatimin e procesit të rregullt të tranzicionit institucional.
Ndaj Treskës ka një kallëzim penal në Prokurorinë e Tiranës, nën dyshimet për abuzime me detyrën dhe fondet e Urdhrit.
