Në prag të ndeshjes Shqipëri–Serbi, tifozët kuqezi kanë zgjedhur të shprehin ndjesitë e tyre përmes një banderole gjigante të shpalosur në godinën e Piramidës në Tiranë.
Mesazhi i qartë dhe i drejtpërdrejtë që lexohej mbi të ishte: “Hasmi i vjetër nuk bahet mik i ri.”
Banderola shfaq portretin e një burri me veshje tradicionale shqiptare, që mendohet se simbolizon Isa Boletinin, i vendosur përballë një turme entuziaste tifozësh të veshur kuqezi dhe të mbushur me flamuj dhe flakadanë.
Ky akt simbolik erdhi si shprehje e ndjenjës kombëtare dhe kujtesës historike, në një moment me ndjeshmëri të lartë, pak orë para ndeshjes me Serbinë.
Përveç emocionit sportiv, kjo ngjarje shpalosi edhe tensionin simbolik që e shoqëron këtë përballje – ku futbolli bëhet jo vetëm lojë, por edhe platformë për shprehjen e identitetit dhe qëndrimeve kolektive.
