Një banor nga fshati Xhyerin i Vlorës ka kontaktuar redaksinë e JOQ Albania për të kërkuar ndihmë emergjente, pasi shtëpia e tij është përmbytur pasditen e kësaj të premte.
Sipas tij, ngjarja ka ndodhur kur disa punonjës kanë lëshuar ujin në kanalin vaditës i cili ishte i papastruar nga mbetjet e dimrit. Rrjedha e ujit ka dalë jashtë kontrollit dhe është drejtuar drejt oborrit të banesës, duke shkaktuar dëme të konsiderueshme.
Në një bisedë telefonike me redaksinë, banori tha: “Marrim në telefon emergjencat e Vlorës dhe na thonë që janë me pushim se është Bajram. Ndërkohë ne po mbytemi. Uji na ka hyrë në shtëpi, te bagëtitë, po na ngordhin!”
Situata është e rëndë dhe kërkon një ndërhyrje të menjëhershme nga autoritetet vendore për të shmangur pasoja të mëdha materiale dhe ndoshta edhe rrezik për jetën.
Mesazhi i plotë i banorit drejtuar redaksisë:
“Përshëndetje, si kaluat. Kemi një rast urgjent në fshatin Xhyerin të Vlorës. Punonjësit e kanalit e kanë hapur atë pa e pastruar dhe ka plasur, duke na përmbytur si familje. Ju lutemi, kërkojmë ndihmë nga organet përkatëse për një zgjidhje sa më të shpejtë.”
