Të qenit baba në kohët moderne është shumë më tepër sesa thjesht të sjellësh të ardhura në shtëpi apo të ndihmosh me detyra të shtëpisë. Një studim i realizuar nga kompania ‘Braun’ ka nxjerrë në pah se baballarët e sotëm duhet të zotërojnë një sërë aftësish të ndryshme për t’u konsideruar “modernë”.
Nga rrjetet sociale deri te përgjegjësitë e përditshme familjare, roli i babait ka evoluar ndjeshëm. Sipas këtij hulumtimi, përdorimi i Instagram-it apo TikTok-ut është vetëm një pjesë e vogël e asaj që pritet nga një baba i ditëve të sotme.
Baballarët modernë duhet të jenë të informuar dhe të lidhur me botën digjitale, por gjithashtu të aftë të mbajnë mend tekstet e këngëve më në modë, duke ndarë momente argëtimi me fëmijët e tyre. Përtej anës moderne, një baba duhet të jetë edhe një mjeshtër i punëve tradicionale.
Aftësi si rregullimi i biçikletave apo kompjuterëve konsiderohen ende thelbësore. Kjo tregon se baballarët sot duhet të balancojnë teknologjinë me prakticitetin, duke qenë të përgatitur për çdo situatë në jetën e përditshme të familjes.
Detyra si ndërrimi i pelenave gjatë natës, ushqyerja e foshnjës, dërgimi i fëmijëve në shkollë dhe, pse jo, edhe bëja e gërshetave për vajzën, janë tashmë pjesë e rutinës që një baba modern duhet të përballojë me përkushtim. Këto angazhime janë dëshmi e një përfshirjeje më të plotë dhe aktive në rritjen e fëmijëve.
Së fundi, të qenit baba modern nënkupton edhe të dish të komunikosh në mënyrë të hapur dhe të ndërtosh marrëdhënie të shëndetshme me të gjithë anëtarët e familjes. Aftësia për të gatuar, për të dëgjuar dhe për të ofruar mbështetje emocionale janë po aq të rëndësishme sa çdo aftësi tjetër teknike.
