Prej më shumë se tre muajsh, shinat e trenit në zonën e njohur si “Treshi” në Tiranë janë lënë të hapura dhe në gjendje të mjerueshme, duke u kthyer në burim shqetësimi të përditshëm për banorët dhe drejtuesit e mjeteve.
Në një video të dërguar nga një qytetar, duket qartë trafiku i rënduar dhe rruga e mbuluar me pluhur e gropa. Sipas tij, edhe pse është ndërhyrë për t’i rregulluar shinat, ato janë lënë përgjysmë dhe çdo ditë, situata përkeqësohet më tej nga shirat dhe mungesa e mirëmbajtjes. Telat e dalë, zhavorri i shpërndarë pa standard dhe gropat e thella po dëmtojnë makinat dhe po rrezikojnë sigurinë e kalimtarëve.
Një tjetër qytetar ka shkruar duke kërkuar publikimin e problemit, me shpresën se institucionet përkatëse do të ndërhyjnë për zgjidhjen e menjëhershme të kësaj situate absurde, që është bërë pjesë e jetës së përditshme për banorët e zonës.
Banorët kërkojnë reagim dhe përgjegjësi, ndërsa rruga vijon të jetë simbol i neglizhencës institucionale.
