Policia zvicerane ka arrestuar një 23 vjeçar shqiptar në kufirin zviceran, teksa transportonte me makinën e tij një ngarkesë prej të paktën 9 kg kokainë të pastër. Kjo e fundit nëse do të përgatitej dhe ndahej në doza, vlera e së cilës është 1 mln euro në treg.
Oficerët ndërhyn në kufirin doganor të San Pietro di Stabio, teksa aksioni është kryer që prej datës 28 maj në Ticino dhe u raportua vetëm së fundmi nga mediat zvicerane. Shqiptari banor i Gjermanisë, po largohej nga Zvicra kur zyrtarët doganorë zbuluan drogën gjatë një kontrolli.
Arrestimi u raportua edhe nga Zyra e Prokurorit Publik, Policia Kantonale dhe Zyra Federale e Doganave, teksa emri i të arrestuarit nuk u bë i ditur, por ai dyshohet se është korrieri i një organizate kriminale që vepron midis Zvicrës, Gjermanisë dhe Italisë.
Shqiptari u mor në pyetje dhe u arrestua nga policia kantonale. I riu akuzohet për shkelje të rëndë të Aktit Federal të Narkotikëve. Hetimi i është besuar prokurores publike Petra Canonica Alexakis, teksa detajet mbahen si sekret hetimor.
