Një ditë pas vrasjes së 57-vjeçarit Pjetër Kaza në fshatin Tale të Lezhës, policia ka arritur të identifikojë autorin e dyshuar të krimit.
Shtetasi G.A. është shpallur në kërkim pasi dyshohet se ka qëlluar me armë zjarri automatike, e pajisur me silenciator, në drejtim të viktimës në momentin kur ai kishte zbritur nga makina për të hapur portën e banesës.
Për shkak të përdorimit të silenciatorit, banorët e zonës nuk kanë dëgjuar të shtëna armësh. Trupi i pajetë i Kazës u gjet nga bashkëshortja e tij në orët e para të mëngjesit të 1 qershorit, pak pasi ai ishte kthyer nga puna në turnin e natës në minierën e Spaçit, Mirditë.
Krimi dyshohet se është motivuar nga një hakmarrje e mëparshme, ndërsa policia ka sekuestruar kamerat e sigurisë nga zona përreth dhe po vijon hetimet për kapjen e autorit.
Deri më tani mbi 10 persona janë shoqëruar dhe marrë në pyetje për të ndihmuar në zbardhjen e ngjarjes.
