Mbretëria e Bashkuar po kërkon të ripërtërijë aftësitë e saj mbrojtëse dhe në listën e dëshirave të armëve të reja janë avionë luftarakë të prodhuar në SHBA, të aftë për të lëshuar armë bërthamore taktike, për të kundërshtuar pjesërisht kërcënimin nga Rusia, raportuan mediat e huaja. Avionët luftarakë britanikë së shpejti mund të mbajnë bomba bërthamore për herë të parë në histori, ndërsa kërcënimi nga Vladimir Putin po rritet.
Qeveria e Sir Keir Starmer është në bisedime shumë të ndjeshme mbi këtë veprim, i cili do të përfaqësonte zhvillimin më të madh në parandalimin e Mbretërisë së Bashkuar që nga Lufta e Ftohtë dhe një njohje se bota ka hyrë në një epokë më të rrezikshme bërthamore. Sekretari i mbrojtjes, John Healey, dhe Admirali Sir Tony Radakin, kreu i forcave të armatosura, po kërkojnë të blejnë avionë luftarakë të prodhuar në Amerikë, të aftë për të lëshuar bomba gravitacionale me fuqi më të ulët se armët bërthamore konvencionale.
Starmer gjithashtu ka dhënë mbështetjen e tij dhe besohet se kanë zhvilluar diskutime me Pentagonin. Sipas mediave të huaja, Healey refuzoi të komentonte mbi bisedimet, por pranoi se Britania duhet të përshtatet me "epokën e re të kërcënimit" me të cilën përballet. Me Presidentin Putin që kërcënon vazhdimisht për përshkallëzim bërthamor në vitet e fundit, ka shqetësime në rritje se Moska mund të përdorë armë bërthamore taktike në Ukrainë ose në frontin lindor të NATO-s.
