Në qytetin Korschenbroich, pranë lumit Rhein në Gjermani, një avion i vogël është rrëzuar mbi tarracën e një shtëpie banimi, duke shkaktuar një zjarr të madh dhe për pasojë dy persona kanë humbur jetën.
Sipas një zëdhënësi të policisë në Neuss, njëra prej viktimave është pilotja 71-vjeçare e avionit, e cila ishte nga Dyseldorfi dhe udhëtonte e vetme. Identiteti i personit të dytë që humbi jetën është ende duke u verifikuar. Shkaku i rrëzimit nuk është bërë ende i ditur.
Menjëherë pas përplasjes, në vendngjarje ka shpërthyer zjarr. Rreth 50 zjarrfikës janë angazhuar në operacionin për shuarjen e flakëve, të cilat janë vënë shpejt nën kontroll.
Pamjet nga vendi i ngjarjes tregojnë bishtin e avionit që del nga oborri i shtëpisë, ndërsa zjarrfikësit me maska kundër tymit punojnë për shuarjen e zjarrit. Fasada e shtëpisë është dëmtuar rëndë dhe mbuluar nga gjurmët e tymit të zi.
