Një apel prekës ka mbërritur në redaksinë e JOQ Albania, ku një baba kërkon ndihmën e shqiptarëve për të shpëtuar jetën e vajzës së tij të vogël.
Prej pesë vitesh, vogëlushja 10-vjeçare e quajtur Emi Malaj, po lufton me një sëmundje të rrallë dhe jashtëzakonisht të rëndë, të quajtur sëmundja Lafora, një sëmundje progresive, degjenerative dhe fatale që prek sistemin nervor, duke shkaktuar epilepsi të rëndë, humbje të aftësive mendore dhe fizike, deri në çmenduri dhe vdekje të hershme.
Familja e saj ka bërë gjithçka për ta mbajtur në jetë. Prej 5 vitesh janë endur spitaleve në të gjithë Europën, duke shpenzuar gjithçka kishin në përpjekje për t’i dhënë Emit një mundësi. Sot, për herë të parë, ata kanë një rreze shprese.
Emi është përzgjedhur si një nga 10 fëmijë në botë për të marrë pjesë në një studim të ri klinik në Dallas të SHBA, me një trajtim eksperimental të quajtur ION283, që synon të ndalojë përparimin e kësaj sëmundjeje të tmerrshme. Është hera e parë që një trajtim i tillë ekziston për Lafora-n, dhe mund të ndryshojë gjithçka, jo vetëm për Emin, por edhe për fëmijët e tjerë që vuajnë nga kjo sëmundje.
Por ky studim financohet vetëm nga familjet pjesëmarrëse. Dhe për të marrë pjesë, Emi dhe familja e saj kanë nevojë urgjente për ndihmën tuaj.
Çdo kontribut, sado i vogël qoftë, është një hap drejt shpëtimit të jetës së saj.
Emi ka shumë ëndrra që dëshiron t'i realizojë. Ajo dëshiron të bëhet biznesmene, dashuron matematikën dhe leximin. Le të bëhemi bashkë për të ndihmuar vogëlushen 10-vjeçare që të jetojë dhe realizojë ëndrrat e saj.
